شىمكەنت قالاسىندا جانتۇرشىگەرلىك وقيعا ورىن الدى. اۋىر جۇك كولىگى جولدان ءوتىپ بارا جاتقان جەتكىنشەك قىزدى تاپتاپ وتكەن. قاپيادا كولىكتىڭ استىنا تۇسكەن قىز قازىر ەسەڭگىرەگەن كۇيدە جانساقتاۋ بولىمىندە جاتىر، دەپ حابارلايدى "ادىرنا" ۇلتتىق پورتالى.
قولدا بار مالىمەتتەر بويىنشا، وقىس جول-كولىك وقيعاسى 10 ناۋرىزدا شىمكەنت قالاسى، قازيەۆ كوشەسىندە بولعان. جۇك كولىگىنىڭ استىنا تۇسكەن جان - 12 جاسار وقۋشى قىز. شىمكەنت قالالىق دەنساۋلىق ساقتاۋ باسقارماسى مالىمەتىنشە، قۇداي وڭداپ، جەتكىنشەك امان قالعان. دەگەنمەن بويىنداعى كوپتەگەن اۋىر دەنە جاراقاتتارىمەن ەمحاناعا جەتكىزىلگەن، دەپ حابارلايدى otyrar.tv.
دارىگەرلەر اۋىر جۇك كولىگىنىڭ استىنا تۇسكەن ناۋقاستىڭ جاعدايىنا قاتىستى مالىمدەمە جاسادى. وقۋشىنىڭ ميى شايقالىپ، باس سۇيەگى زاقىمدانعان. سونىمەن قاتار، وعان ەكى جىلىنشەك سۇيەكتىڭ، يىقتىڭ ىشكى سىنىعى سىندى جانە تاعى باسقا دياگنوزدار قويىلدى.
بەينەباقىلاۋ كادرلارى سانا-cەزىمىڭىزگە اۋىر اسەر ەتۋى مۇمكىن ەكەنىن ەسكەرتەمىز!
- جاعدايى وتە اۋىر، تۇراقسىز، ەسەڭگىرەگەن كۇيدە، - دەيدى دارىگەرلەر.
جولدان وتەمىن دەپ اۋىر جاراقات العان جەتكىنشەك مامانداردىڭ ءجىتى باقىلاۋىندا بولادى.
"ادىرنا" ۇلتتىق پورتالى
