سپورتتىق گيمناستيكادان قازاقستان قۇراماسىنىڭ قورجىنى تاعى ءبىر التىن مەدالمەن تولىقتى! باكۋدە وتكەن الەم كۋبوگى كەزەڭىندە ناريمان قۇربانوۆ جەڭىسكە جەتتى. بۇل تۋرالى مادەنيەت جانە سپورت ءمينيسترى اسحات ورالوۆ Facebook پاراقشاسىنا جازدى، دەپ حابارلايدى “ادىرنا” ۇلتتىق پورتالى.
قازاقستان سپورتشىسى ات ۇستىندە جاتتىعۋدا ۇزدىك اتاندى. ول 15.300 ۇپاي جيناپ، يرلانديا مەن البانيادان كەلگەن قارسىلاستارىنان باسىم ءتۇستى.
“ايتا كەتەرلىگى، ۇلتتىق قۇراما ءوز تاريحىندا تۇڭعىش رەت الەم كۋبوگىنىڭ ءبىر كەزەڭىندە بىردەن ەكى التىن جۇلدەگە يە بولدى. العاشقى التىندى ميلاد كاريمي جەڭىپ العان بولاتىن. ال ناريمان ءبىر اپتا بۇرىن كاتاردا وتكەن جارىس كەزەڭىندە دە ۇزدىك تانىلعانىن اتاپ وتكەن ءجون.
گيمناستتارىمىزدىڭ ۇزدىك ناتيجەلەرى ءبىزدى ەرەكشە قۋانىشقا بولەيدى. بارشا قازاقستاندىقتاردى وسى جەڭىسپەن قۇتتىقتايمىن، ناريمانعا الداعى سايىستاردا دا تولاعاي تابىس تىلەيمىن!”، دەپ جازدى اسحات ورالوۆ.
