ەلدىڭ سولتۇستىگىندە سايلاۋالدى تۋر جالعاسۋدا. Respublica پارتياسىنىڭ كومانداسى اقمولا وبلىسىنا كەلدى. بۇل – ناۋقان كەزەڭىندە قازاقستاننىڭ 14-ءشى ايماعى.
كوكشەتاۋ قالاسىندا جالپى حالىقپەن، اۋىل شارۋاشىلىعى تاۋار وندىرۋشىلەرىمەن، ەڭبەك ۇجىمدارىمەن جانە ىسكەر ايەلدەر قاۋىمداستىعىمەن كەزدەسۋلەر ءوتتى. ءىس-شارالارعا بارلىعى 1000-عا جۋىق ادام قاتىستى.
«قازىر ۋنيۆەرسيتەتتەر مەن بيزنەستىڭ ءارتۇرلى كەڭىستىكتە ەكەنىن كورىپ وتىرمىز. بيزنەس وكىلدەرى جوعارى وقۋ ورىندارىنىڭ قامقورشىلىق كەڭەستەرىندە بولىپ، بولاشاق مامانداردى دايارلاۋ باعدارلامالارىن رەتتەۋى قاجەت. بۇل شارا ورتا مەرزىمدى پەرسپەكتيۆادا ءبىلىم ساپاسى مەن ەلدىڭ كادرلىق الەۋەتىن ارتتىرۋعا مۇمكىندىك بەرەدى»، - دەدى پارتيا توراعاسى، قر پارلامەنتى ءماجىلىسىنىڭ دەپۋتاتتىعىنا كانديدات ايداربەك قوجانازاروۆ.
ول «تىنىس» اق ۇجىمىمەن كەزدەسۋ بارىسىندا جوعارى بىلىكتى مامانداردى دايارلاۋ ءۇشىن بيزنەس پەن جوعارى وقۋ ورىندارىنىڭ بەلسەندى ىنتىماقتاستىعى قاجەتتىگىن اتاپ ءوتتى.
پارتيانىڭ تەڭ توراعاسى، قر پارلامەنتى ءماجىلىسىنىڭ دەپۋتاتتىعىنا كانديدات دينارا شۇكىجانوۆا وبلىستىق ىسكەر ايەلدەر قاۋىمداستىعىنىڭ وكىلدەرىمەن كەزدەسۋىندە قازاقستاندىق قوعامدا ءالى كۇنگە دەيىن ايەلدەرمەن بايلانىسى بار ستەرەوتيپتەر تاقىرىبىن كوتەردى.
«قوستاناي قالاسىندا «اگروماشحولدينگ KZ» جانە «سارىارقااۆتوپروم» سياقتى كومبايندار مەن ماشينالار شىعاراتىن زاۋىتتار بار ەكەنىن ءبارىڭىز بىلەسىزدەر. مەن وسى قۇرىلىمدارعا 2011 جىلى قاتارداعى باسشى بولىپ كەلدىم، 12 جىلدان كەيىن وسى كاسىپورىنداردى باسقارۋعا كىرىستىم. ءبىر كۇنى كليەنتتەردىڭ ءبىرى مەنىمەن كەزدەسۋگە كەلدى. دالىزدە ءجۇر ەكەن، قارسى الايىن دەپ الدىنان شىقتىم، ول كۇرتەشەسىن شەشىپ، مەنىڭ قولىما ۇستاتتى. سودان سوڭ: «راحمەت، ءسىزدىڭ پرەزيدەنتىڭىز قايدا؟» دەدى. مەن پرەزيدەنت ەكەنىمدى ايتتىم، بىراق ول: «جوق، جوق! كومپانيانىڭ پرەزيدەنتى – دينارا قايدا؟» - دەدى. مەن كومپانيانىڭ باسشىسى ەكەنىمدى ايتتىم تاعى دا. ول تاڭ قالدى، كەڭ شالبار كيگەن، قولىندا بالعاسى بار، بويى ەكى مەتر ايەلدى ەلەستەتكەنىن دە جاسىرمادى. مەن مۇنداي ستەرەوتيپتەردى ءجيى كەزدەستىرەمىن»، - دەدى دينارا شۇكىجانوۆا
سوندىقتان، Respublica پارتياسىنىڭ تەڭ توراعاسى قازاقستاندىق قوعامداعى كوشباسشى ايەلدەرگە دەگەن كوزقاراستى وزگەرتۋ قاجەت دەپ سانايدى. شۇكىجانوۆانىڭ پارلامەنتتەگى ايەلدەر ۇلەسىن ارتتىرۋدى تالاپ ەتۋىنىڭ ءبىر سەبەبى دە وسىندا.
ەسكە سالايىق، ناۋقاننىڭ ەكى اپتادان ءسال استام ۋاقىتىنىڭ قورىتىندىسى بويىنشا Respublica پارتياسىنىڭ مۇشەلەرى استانا، الماتى، تالدىقورعان، شىمكەنت، قوناەۆ، تاراز، تۇركىستان، قىزىلوردا، قوستاناي، ورال، اقتوبە، ورال، پەتروپاۆل قالالارىن، سونداي-اق بىرقاتار اۋىلدىق ەلدى مەكەندەرىن ارالادى.
وسى ۋاقىتقا دەيىن 153 مىڭعا جۋىق قازاقستاندىق پارتيا قاتارىنا وتۋگە ءوتىنىش بىلدىرگەن.
ەرتەڭ پارتيالىقتار ساپارىن پاۆلودار قالاسىندا جالعاستىرادى.
