Eldiń soltústiginde saılaýaldy týr jalǵasýda. Respublica partııasynyń komandasy Aqmola oblysyna keldi. Bul – naýqan kezeńinde Qazaqstannyń 14-shi aımaǵy.
Kókshetaý qalasynda jalpy halyqpen, aýyl sharýashylyǵy taýar óndirýshilerimen, eńbek ujymdarymen jáne Isker áıelder qaýymdastyǵymen kezdesýler ótti. Is-sharalarǵa barlyǵy 1000-ǵa jýyq adam qatysty.
«Qazir ýnıversıtetter men bıznestiń ártúrli keńistikte ekenin kórip otyrmyz. Bıznes ókilderi joǵary oqý oryndarynyń qamqorshylyq keńesterinde bolyp, bolashaq mamandardy daıarlaý baǵdarlamalaryn retteýi qajet. Bul shara orta merzimdi perspektıvada bilim sapasy men eldiń kadrlyq áleýetin arttyrýǵa múmkindik beredi», - dedi partııa tóraǵasy, QR Parlamenti Májilisiniń depýtattyǵyna kandıdat Aıdarbek Qojanazarov.
Ol «Tynys» AQ ujymymen kezdesý barysynda joǵary bilikti mamandardy daıarlaý úshin bıznes pen joǵary oqý oryndarynyń belsendi yntymaqtastyǵy qajettigin atap ótti.
Partııanyń teń tóraǵasy, QR Parlamenti Májilisiniń depýtattyǵyna kandıdat Dınara Shúkijanova oblystyq Isker áıelder qaýymdastyǵynyń ókilderimen kezdesýinde qazaqstandyq qoǵamda áli kúnge deıin áıeldermen baılanysy bar stereotıpter taqyrybyn kóterdi.
«Qostanaı qalasynda «AgromashHoldıng KZ» jáne «SaryarqaAvtoprom» sııaqty kombaındar men mashınalar shyǵaratyn zaýyttar bar ekenin bárińiz bilesizder. Men osy qurylymdarǵa 2011 jyly qatardaǵy basshy bolyp keldim, 12 jyldan keıin osy kásiporyndardy basqarýǵa kiristim. Bir kúni klıentterdiń biri menimen kezdesýge keldi. Dálizde júr eken, qarsy alaıyn dep aldynan shyqtym, ol kúrteshesin sheship, meniń qolyma ustatty. Sodan soń: «Rahmet, sizdiń prezıdentińiz qaıda?» dedi. Men prezıdent ekenimdi aıttym, biraq ol: «Joq, joq! Kompanııanyń prezıdenti – Dınara qaıda?» - dedi. Men kompanııanyń basshysy ekenimdi aıttym taǵy da. Ol tań qaldy, keń shalbar kıgen, qolynda balǵasy bar, boıy eki metr áıeldi elestetkenin de jasyrmady. Men mundaı stereotıpterdi jıi kezdestiremin», - dedi Dınara Shúkijanova
Sondyqtan, Respublica partııasynyń teń tóraǵasy qazaqstandyq qoǵamdaǵy kóshbasshy áıelderge degen kózqarasty ózgertý qajet dep sanaıdy. Shúkijanovanyń Parlamenttegi áıelder úlesin arttyrýdy talap etýiniń bir sebebi de osynda.
Eske salaıyq, naýqannyń eki aptadan sál astam ýaqytynyń qorytyndysy boıynsha Respublica partııasynyń músheleri Astana, Almaty, Taldyqorǵan, Shymkent, Qonaev, Taraz, Túrkistan, Qyzylorda, Qostanaı, Oral, Aqtóbe, Oral, Petropavl qalalaryn, sondaı-aq birqatar aýyldyq eldi mekenderin aralady.
Osy ýaqytqa deıin 153 myńǵa jýyq qazaqstandyq partııa qataryna ótýge ótinish bildirgen.
Erteń partııalyqtar saparyn Pavlodar qalasynda jalǵastyrady.
