ەندى بالاعات سوزدەر ايتقان ادامدار 69 000 تەڭگە (بۇرىن 17 250 تەڭگە بولاتىن) ايىپپۇل ارقالايدى نەمەسە 15 تاۋلىككە دەيىن قاماۋعا الىنادى.
سونىمەن بالاعات ءسوز ايتقانى ءۇشىن جاۋاپكەرشىلىك قانشالىقتى كۇشەيدى؟
وسى جىلدان باستاپ ۇساق بۇزاقىلىق جاساعانى ءۇشىن جازا كۇشەيتىلەدى. ماسەلەن، اۆتوبۋستا بىرەۋ بالالاردىڭ نەمەسە اعا بۋىن وكىلدەرىنىڭ كوزىنشە، ياعني قوعامدىق ورىندا، اينالاسىنداعىلاردى سىيلاماي، قوعامدىق ءتارتىپتى بۇزىپ، بالاعات سوزدەر ايتقان جاعدايدا، وعان 17 250 تەڭگە ايىپپۇل سالىنادى نەمەسە 10 تاۋلىككە دەيىن قاماۋعا الىنادى.
6 ناۋرىزدان باستاپ مۇنداي ارەكەتتەر ءۇشىن 20 اەك (69 مىڭ تەنگە تۇرىندەگى جازا) ايىپپۇل نەمەسە 5-تەن 15 تاۋلىككە دەيىن قاماۋعا الۋ كوزدەلگەن.
بىرەۋ مەنى جاي عانا بالاعاتتادى دەپ ايتسا، ايىپپۇل سالىنا ما؟
ءاربىر ءوتىنىش بويىنشا پوليتسيا قىزمەتكەرلەرى دالەلدەمەلەر جينايدى. بۇل ازاماتتاردىڭ ءوتىنىشى، كۋاگەرلەردىڭ ايعاقتارى، سونىمەن بىرگە قۇقىق بۇزۋشىلىقتىڭ اۋديو، بەينەتۇسىرىلىمى، قاجەت بولعان جاعدايدا ساراپشىنىڭ قورىتىندىسى بولادى. قۇقىقتىق باعانى سوت بەرەدى.
ۇيدە، كولىكتە ايتىلعان بالاعات سوزدەر ءۇشىن دە جازالاي ما؟
اتاپ وتكەنىمدەي، ءبارى ءمان-جايعا بايلانىستى. ۇساق بۇزاقىلىق بويىنشا جاۋاپكەرشىلىككە تارتۋ ءۇشىن قوعامدىق ورىنداردا بالاعات سوزدەر ايتۋ، اينالاسىنداعىلاردى سىيلاماۋ، سونىمەن بىرگە قوعامدىق ءتارتىپ پەن ازاماتتاردىڭ تىنىشتىعىن بۇزۋ – مىندەتتى شارت.
الەۋمەتتىك جەلىدەگى بالاعات سوزدەر قانداي باپپەن قارالادى؟
الەۋمەتتىك جەلىلەردە بالاعات سوزدەر ايتقانى ءۇشىن، ەگەر مۇنداي ارەكەتتەر قوعامدىق ورىنداردا نەمەسە اينالاسىنداعىلاردىڭ، ازاماتتاردىڭ تىنىشتىعىن بۇزسا، بۇل ۇساق بۇزاقىلىق بابىمەن قاراستىرىلادى.
قاي تىلدەگى بالاعات سوزدەرگە ايىپپۇل سالىنادى؟
جالپى جوعارىدا اتالعان جاعدايلار بولعان كەزدە قاي تىلدە بولماسا دا بالاعات سوزدەر ايتقانى ءۇشىن جاۋاپكەرشىلىك بار.
"ادىرنا" ۇلتتىق پورتالى
