Jýrnalıst Saltan Saıranuly jelige taraǵan oqýshynyń din týraly aıtqan vıdeosyna pikir bildirdi, dep habarlaıdy “Adyrna” ulttyq portaly.
Aıtýynsha, mektep oqýshysynyń negizsiz, dálel-dáıeksiz, jalǵan faktilermen batyl saırap turǵany – «muǵaliminiń» teris aqparattarmen oqýshylarynyń mılaryn shaıyp, burmalanǵan málimettermen programmalap, jalǵan dáıekterdi sanasyna sińirip tastaǵandyǵynyń kórinisi.
“Ýatsabyma mynandaı bir vıdeo keldi. Tyńdap shyqtym. Mektep oqýshysynyń bulaı negizsiz, qısynsyz, dálel-dáıeksiz, jalǵan faktilermen batyl saırap turǵany – «muǵaliminiń» teris aqparattarmen oqýshylarynyń mılaryn shaıyp, burmalanǵan málimettermen programmalap, jalǵan dáıekterdi sanasyna sińirip tastaǵandyǵynyń kórinisi. Bul vıdeony túsirip, taratýy da muǵaliminiń óziniń bul «jemisi men jetistigine» masattanýy, maqtanysh kórýi degen sóz.
Biz de bul vıdeoǵa ózimizdiń pikirimizdi bildire keteıik. Sebebi, mundaı «pedagogtardyń» balalarymyzǵa sabaq berýi – óte qaýipti. Tez arada shara qoldanylyp, mektepten alastatylýy tıis dep esepteımiz.
Oqýshy óziniń sózinde: «Evreıler Islam dinin oılap tapty da, ony damýshy memleketterge, ıaǵnı Azııa, Saýd Arabııa elderine ótkizdi de, olar ózderinen ol dindi alyp tastady. Olardyń ózderiniń konstıtýııalyq zańdary boıynsha olarǵa eshqandaı da Islam dini bolmaıdy, ony shektep tastaǵan. Sebebi, Islam dini adamdardy belgili bir nárselerden shekteıdi», – deıdi.
Ne degen sumdyq sóz bul? Mundaı málimetti oqýshy ne nársege súıenip aıtyp otyr, durysyn aıtsaq, muǵalimi buny qandaı málimetke súıenip úıretip otyr? Oqýshynyń bul teris pikirin túzetpegenine qaraǵanda, bul oımen muǵalimi de kelisip otyr degen sóz. Muny muǵaliminiń vıdeoda jany kirip, oqýshysyn qolpashtap qoldap otyrǵanynan-aq túsinýge bolady. Demek, bul muǵalim san ǵasyrdan beri Alladan kelgen Islam dinin saltyna aınaldyrǵan, barlyq qundylyǵyn osy Islamǵa negizdegen ata-babamyzdy, tarıhymyzdy, ulttyǵymyzdy mansuqtap jatqan qanshama oqýshy tárbıelep jatyr degen sóz. Sosyn dereksiz, negizsiz, jalǵan dáıektermen sóıleý – ǵylymǵa, bilimge úlken qııanat. Osyǵan súıensek, bul muǵalim erteńgi kúni eldiń bolashaǵyna balta shabatyn, ǵylymǵa qııanat qylatyn, memleketke iritki salatyn urpaq tárbıelep shyǵýda”,- dedi jýrnalıst, dintaný ǵylymynyń magıstri Saltan Saıranuly.
