Súıinshi! Aral aıdynyń aýdany keńip, sýy molaıdy. 2023 jylǵy qańtar-aqpanda teńizge 800 mıllıon tekshe metr sý túsken. Bul kórsetkish byltyr jyl boıǵy kórsetkishke para-par, dep súıinshileıdi "Adyrna" ulttyq portaly.
...Bul ólke qalaısha bolady azap túnegi,
Ejelgi muń-zaryń az ba edi, qazaqtyń eli?
Qaıtemin, Aralym, búginde qaldy súlderiń,
Tózimi eline uqsaǵan kónbisim meniń, - dep aqyn Muhtar Shahanov jyrǵa qosqan Aral taǵdyryna qatysty qýantarlyq aqpar habarlandy.
Qyzylorda oblysy ákimdiginiń habarlaýynsha, Aral teńiziniń deńgeıi 2022 jyldyń qazan aıymen salystyrǵanda 48 santımetrge artqan. 2022 jyl boıy Aral teńizine 816 mıllıon tekshe metr sý quıylsa, 2023 jylǵy eki aıdyń ózinde 803 mıllıon sý túsken.
"Aral-Syrdarııa basseındik ınspekııasy basshysynyń mindetin atqarýshy Zeınýlla Qaztoǵanov habarlaǵandaı, osy ýaqytqa deıin Soltústik Aral teńizine jınalǵan sý kólemi 27,0 mlrd.tekshe metrden, 18,5 mlrd tekshe metrge azaıyp, sý deńgeıi 40,42 mBJ (metr Baltyq júıesimen) deıin tómendegen bolatyn. 2022 jyldyń qazan aıynan bastap búgingi tańǵa teńizdegi sý deńgeıi 40,90 mBJ (48 santımetr) kóterilip, jınalǵan sý kólemi 19,7 mlrd tekshe metrge ulǵaıdy", – dep jazylǵan Qyzylorda oblysy ákimdiginiń habarlamasynda.
"Adyrna" ulttyq portaly
