قىزىلوردا قالاسىنىڭ 49 جاستاعى تۇرعىنى ءبىر جارىم جىلدان بەرى كومادا جاتىر، دەپ حابارلايدى "ادىرنا" ۇلتتىق پورتالى 31 ارناعا سىلتەپ.
ناۋقاستىڭ جۇبايى قارلىعاش ساقتاپبەرگەنوۆا 2024 جىلدىڭ جازىندا جولداسىم پنەۆمونياعا شالدىعىپ، اۋرۋحاناعا باردى دەيدى.
دەگەنمەن، ىستىق بولمەدە اۋا جەتپەي قينالعان ازامات ءبىر كۇننەن كەيىن "ۇيدەن ەم قابىلدايمىن" دەپ دارىگەردەن ءوزى سۇرانىپ شىعىپتى. بىراق، ازامات تاكسيگە مىنگەن بويدا بىرنەشە ساتكە جۇرەگى سوقپاي، ميى جۇمىسىن توقتاتقان. سودان بەرى ەس-ءتۇسسىز كۇيدە جاتىر. ەر ادامنىڭ تۋىستارى بۇل جاعداي دارىگەرلەردىڭ دەر كەزىندە كومەك كورسەتپەۋىنەن تۋىنداپ وتىر دەپ ارىزدانۋدا.
«دارىگەرلەر ىشكى اعزالارى جۇمىس ىستەپ تۇر دەيدى. بىراق جۇرەگى سوقپاعان 10–11 مينۋتتىڭ ىشىندە ميى زاقىمدانعان. بۇگىن ونىڭ ەس-ءتۇسسىز جاتقانىنa تۋرا 1 جىل 7 اي بولدى»، – دەيدى ناۋقاستىڭ جۇبايى قارلىعاش ساقتاپبەرگەنوۆا.
ال قىزىلوردا وبلىستىق كوپبەيىندى اۋرۋحاناسىنىڭ وكىلدەرى ناۋقاسقا بارلىق قاجەتتى مەديتسينالىق كومەك كورسەتىلگەنىن مالىمدەدى.
«دارىگەرلەر تەكسەرگەننەن كەيىن ناۋقاسقا پنەۆمونيا دياگنوزى قويىلدى. ول تەراپيا بولىمىنە جاتقىزىلىپ، پۋلمونولوگ دارىگەردىڭ باقىلاۋىندا بولدى. مەديتسينالىق ستاندارتتارعا سايكەس بارلىق ەم-شارالار تاعايىندالدى»، – دەدى اۋرۋحانا باس دارىگەرىنىڭ ورىنباسارى گۇلسىم بەرجاپپاروۆا.
