قر پرەمەر-ءمينيسترى ءاليحان سمايىلوۆ قحر-دىڭ قازاقستانداعى توتەنشە جانە وكىلەتتى ەلشىسى چجان سياومەن كەزدەسۋ وتكىزدى. بۇل تۋرالى ۇكىمەتتىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
تاراپتار ساۋدا-ساتتىق، ينۆەستيتسيالار تارتۋ، ونەركاسىپ، ەنەرگەتيكا، اۋىل شارۋاشىلىعى، كولىك جانە لوگيستيكا، تسيفرلىق تەحنولوگيالار، ترانسشەكارالىق وزەندەردى پايدالانۋ جانە ت. ب. سالالارداعى مەملەكەتارالىق ىنتىماقتاستىقتىڭ كەڭ اۋقىمدى ماسەلەلەرىن تالقىلادى.
پرەمەر-مينيستر قازاقستاننىڭ جالپى تاۋار اينالىمىنىڭ 18%-ىن قۇرايتىن قىتاي ەلىمىزدىڭ ءىرى ساۋدا سەرىكتەستەرىنىڭ ءبىرى ەكەنىن اتاپ ءوتتى. سونداي-اق قحر مەملەكەتىمىزدىڭ ەكونوميكاسىنا ينۆەستيتسيا سالاتىن توپ-5 ەلدىڭ قاتارىنا كىرەدى.
سونىمەن قاتار ءاليحان سمايىلوۆ قازاقستان ۇكىمەتى ەكى ەل باسشىلارىنىڭ 2030 جىلعا قاراي ءوزارا ساۋدانى $35 ملرد-قا دەيىن ۇلعايتۋ جونىندەگى تاپسىرماسىن ورىنداۋ ماقساتىندا بەلسەندى تۇردە جۇمىس جۇرگىزۋگە دايىن ەكەنىن اتاپ ءوتتى.
«ءبىزدىڭ ەلدەرىمىزدىڭ اۋىل شارۋاشىلىعى ونىمدەرىن جەتكىزۋ سالاسىندا ايتارلىقتاي الەۋەتى بار. قازاقستاندىق كاسىپورىندار قىتايعا ازىق-تۇلىك تاۋارلارىنىڭ ەكسپورتىن ودان ءارى ارتتىرعاسى كەلەدى. وسىعان بايلانىستى ساۋدا-ساتتىققا قاتىستى كەدەرگىلەر مەن شەكتەۋلەردى ءارى قاراي الىپ تاستاۋ ماڭىزدى بولىپ وتىر»، — دەدى پرەمەر-مينيستر.
ءوز كەزەگىندە چجان سياو قىتايلىق تاراپتىڭ قازاقستاننان اۋىل شارۋاشىلىعى ونىمدەرىن يمپورتتاۋعا، تەمىرجول تاسىمالى كولەمىن ۇلعايتۋعا، IT-سەكتورداعى وڭىرارالىق ءوزارا ءىس-قيمىل مەن ارىپتەستىكتى نىعايتۋعا مۇددەلى ەكەنىن ءبىلدىردى.
ونىڭ ايتۋىنشا، قازىرگى ۋاقىتتا قازاقستاندىق كومپانيالارعا قىتايدىڭ ءىرى ساۋدا پلاتفورمالارىنا جانە جالپى قحر نارىعىنا شىعۋعا بەلسەندى كومەك كورسەتىلۋدە.
«ءبىز ەكونوميكالىق قارىم-قاتىناستارىمىزدى ساپالى جاڭا دەڭگەيگە شىعارۋ ءۇشىن زور الەۋەت بار دەپ سانايمىز. الدىمىزعا جاڭا، بيىك ماقساتتار قويۋىمىز كەرەك»، — دەدى چجان سياو.
كەزدەسۋ بارىسىندا تاراپتار «قورعاس» شىحو-نىڭ جۇمىسىن قالپىنا كەلتىرۋ، «باقتى-پوكيتۋ» اۆتوموبيل وتكىزۋ بەكەتى اۋدانىندا ءۇشىنشى تەمىر جول وتكەلىن اشۋ، ترانسكاسپي حالىقارالىق ءىرى اۆتوموبيل جولدارىن سالۋ جانە ماشينا جاساۋ سالاسىندا جاڭا وندىرىستەردى قۇرۋ ماسەلەلەرىن قوزعادى.
سونىمەن قاتار تاياۋ بولاشاقتا استانا مەن بەيجىڭ اراسىندا اپتاسىنا ءۇش رەيس جيىلىگىمەن اۋە قاتىناسىن قالپىنا كەلتىرۋ جانە ازاماتتاردىڭ ءوزارا ساپارلارى كەزىندەگى راسىمدەردى وڭايلاتۋ جوسپارلانىپ وتىرعانى اتاپ ءوتىلدى.
تاراپتار كەزدەسۋ قورىتىندىسى بويىنشا بارلىق ەكىجاقتى ءتيىمدى باعىتتار بويىنشا ءوزارا بەلسەندى ءىس-قيمىلدى جالعاستىرۋعا دايىن ەكەنىن راستادى.
"ادىرنا" ۇلتتىق پورتالى
