24 اقپان كۇنى تايلاندتا جول-كولىك اپاتىنان قايتىس بولعان Darkhan Juzz ساحنالىق اتىمەن بەلگىلى وتاندىق ءانشى دارحان جۇنىسبەكوۆتىڭ اياقتالماعان البومى جارىققا شىعادى. بۇل تۋرالى «õzen» مۋزىكالىق لەيبلىنىڭ الەۋمەتتىك جەلىدەگى پاراقشاسىندا جازىلدى، دەپ حابارلايدى "ادىرنا" ۇلتتىق پورتالى.
«Darkhan Juzz-ءدىڭ اياقتالماعان البومى قالدى. ءبىز ونى مىندەتتى تۇردە اياقتاپ، شىعارامىز. ونىڭ بارلىق اندەرىن پايدالانۋ قۇقىعى ۇلى ادي مەن قىزى ايداناعا بەرىلەدى. ستريمينگىدەن تۇسەتىن 100% قاراجات ونىڭ وتباسىنا اۋدارىلادى. دارحاننىڭ مۇراسىن ساقتاپ قالۋ ءۇشىن كوپ جۇمىس اتقارىلادى. ونىڭ مۋزىكاسى ماڭگى ساقتالسىن»، - دەلىنگەن «õzen» لەيبلىنىڭ ءىnstagram-داعى رەسمي پاراقشاسىندا جاريالانعان حابارلامادا.
سونداي-اق، جەلىدە قازاقستاندىق جاس انشىلەر دارحان جۇنىسبەكوۆتىڭ ارتىندا قالعان ەكى بالاسى مەن وتباسىنا قولداۋ كورسەتۋ ءۇشىن كومەك جيناۋ باستالعانىن حابارلاپ جاتىر.
ايتا كەتەيك، سىرتقى ىستەر مينيسترلىگى ءمايىتتى قازاقستانعا جەتكىزۋ ءۇشىن قاجەتتى قۇجاتتاردى رەسىمدەۋ بويىنشا جۇمىس جۇرگىزىلىپ جاتقانىن ءمالىم ەتتى. كەشە كەشكە ونەر يەسىنىڭ جانكۇيەرلەرى الماتى قالاسىندا ونىڭ رۋحىنا تاعزىم ەتىپ، مۋزىكانتتىڭ اندەرىن ورىنداۋمەن ەسكە الدى.
