ءورت
ءورت ىشىندە جانىپ جاتىر بەس بوبەك!..
نە ىستەۋ كەرەك؟ نە ىستەمەك ءجون؟ نە ىستەمەك؟
جان-شىرىلىن ەستۋ ءۇشىن ولاردىڭ –
ار مەن يمان، سانا مەن جاد، ەس كەرەك!
شىڭعىرساڭ دا الەم مەنەن كۇلەمگە،
جان تاپپايسىڭ قىزىل ورتكە كىرەرگە.
بەس بوبەككە كەلمەيدى ەشكىم!
ويتكەنى،
بەس ماسەلە قارالماعان بۇل ەلدە!
بەس تال گۇلىم… جانۋدا بەس ءبۇلدىرشىن،
اي اڭىراپ، جۇلدىز شۋلاپ شىڭعىرسىن –
ودان دا وتكەن ماسەلە كوپ ماڭىزدى،
جەتى تۇندە جانعان وتقا كىم كىرسىن؟!
ءباڭ ۇمىتقان ورتەنگەن بەس بوتامدى،
جان ۇلىتقان ورتەنگەن حوش-وتاندى…
ءورت ءسوندىرىپ جۇرسە تۇندە جۇگىرىپ،
كىم قۇشادى «ورتەنگەن» جاس توقالدى؟!
لاپىلدايدى، شىرقىرايدى – بەس قىرشىن!
و ول ورتكە بەتتەي الماس ەشبىر سۇم.
ول جان-ءۇندى ەستىمەدىڭ فانيدە،
ءورت-توزاقتىڭ تۇبىندە ونى ەستىرسىڭ!
سارىارقانىڭ سارى ايازى ساقىلداپ،
تۋعان وتان كورگەننەن سوڭ اقىر جات –
پانا تاپپاي بەس كوگەرشىن كەتتى ۇشىپ،
قارا تۇندە قاناتتارى لاپىلداپ!
II
ءتىرى مۇردە. كۇل كەيىپتى مۇسىنگە
اينالسام دا، قىپ-قىزىل ءورت – ىشىمدە.
تۋعان ءتىلىم – وتىز جىلداي ورتەنگەن،
لاپىلدايدى مەنىڭ وتىز تىسىمدە!
سۇيەگىمنىڭ شاشىلعانمەن كۇلى كوك،
بۇل ءبىر ءورتتىڭ باسىلاتىن ءتۇرى جوق.
«جاسىل ارنا» – كاپىر-ارنا ورتەگەن
لاۋلايمىن كەپ ازىرەت سۇلتان ءدىنى بوپ!
قوڭىر قوزىم، سەنىپ قىزىل قاسقىرعا،
ءجۇرسىڭ ءالى ءورت-توپاننىڭ استىندا.
تاۋ شارپيدى ءورت ء–ۇنى بولىپ قازاقتىڭ
قۇنسىز كەتكەن «قىزىلاعاش» – تاسقىندا!
اق وردامنىڭ تۇندىگىنە شوق ءتۇسىپ،
شوشىپ كەتەم، ورتەنەردەي وت قۇشىپ.
كوك شارپيدى ءورت –قۇنى بولىپ قازاقتىڭ
قان-وزەندە قىرعىن تاپقان وققا ۇشىپ!
ۋا، قاشان ورالاسىڭ، قۇت-ايبىن؟ –
ەندى قانشا ورتەنەمىن، جۇتايمىن؟
بۇلت كوشەدى…تۇتىنى ەدى ول قازاقتىڭ –
توزاعىندا جانعان كاپىر-قىتايدىڭ!
جۇرەك لاۋلاپ، ءتىل لاپىلداپ، قوزدى ۇرتىم،
جۇرگەن جەندەت تويدىرا الماي كوز قۇرتىن
ءبۇلدىرشىنىن تاستاي سالاد وتقا ءۇيتىپ،
ول سەبەبى وققا قيعان – ءوز جۇرتىن!
ەي، ەر قازاق، ەسكە اپ باعزى سەرتىڭدى،
جاز دەرتىڭدى، اش نۇرسيپات-كوركىڭدى.
ءوزىڭ قورعا ءوز كەنتىڭدى! –كوردىڭ عوي:
ءورت ىشىندە بوتاڭ جانىپ جاتسا دا،
ءورت ىشىندە وتان جانىپ جاتسا دا،
ەشكىم كەلىپ سوندىرمەيدى ءورتىڭدى!
قورعاماساڭ، – تەككە كەتپەس بۇل قۇربان،
ءىزىڭ-توزىڭ جوعالادى تۇل قىردان…
…قابىرىڭدە –قاۋىزىنان جاس توگەر
بەس قىزعالداق – ءورت ىشىندە شىڭعىرعان!..
