ÓRT
Órt ishinde janyp jatyr bes bóbek!..
Ne isteý kerek? Ne istemek jón? Ne istemek?
Jan-shyrylyn estý úshin olardyń –
Ar men Iman, Sana men Jad, Es kerek!
Shyńǵyrsań da álem menen kúlemge,
Jan tappaısyń qyzyl órtke kirerge.
Bes bóbekke kelmeıdi eshkim!
Óıtkeni,
BES MÁSELE qaralmaǵan bul elde!
Bes tal gúlim… janýda bes búldirshin,
Aı ańyrap, juldyz shýlap shyńǵyrsyn –
ODAN DA ÓTKEN MÁSELE KÓP MAŃYZDY,
Jeti túnde janǵan otqa kim kirsin?!
Báń umytqan órtengen bes botamdy,
Jan ulytqan órtengen Hosh-Otandy…
Órt sóndirip júrse túnde júgirip,
Kim qushady «órtengen» jas toqaldy?!
Lapyldaıdy, shyrqyraıdy – bes qyrshyn!
O ol órtke betteı almas eshbir sum.
Ol JAN-ÚNDI estimediń fánıde,
Órt-Tozaqtyń túbinde ony estirsiń!
Saryarqanyń sary aıazy saqyldap,
Týǵan Otan kórgennen soń aqyr jat –
Pana tappaı bes kógershin ketti ushyp,
Qara túnde qanattary lapyldap!
II
Tiri múrde. Kúl keıipti músinge
Aınalsam da, qyp-qyzyl órt – ishimde.
Týǵan Tilim – otyz jyldaı órtengen,
Lapyldaıdy meniń otyz tisimde!
Súıegimniń shashylǵanmen kúli kók,
Bul bir órttiń basylatyn túri joq.
«Jasyl arna» – kápir-arna órtegen
Laýlaımyn kep Áziret Sultan dini bop!
Qońyr qozym, senip qyzyl qasqyrǵa,
Júrsiń áli órt-topannyń astynda.
Taý sharpıdy órt –úni bolyp qazaqtyń
Qunsyz ketken «Qyzylaǵash» – tasqynda!
Aq ordamnyń túndigine shoq túsip,
Shoshyp ketem, órtenerdeı ot qushyp.
Kók sharpıdy órt –quny bolyp qazaqtyń
Qan-Ózende qyrǵyn tapqan oqqa ushyp!
Ýa, qashan oralasyń, Qut-Aıbyn? –
Endi qansha órtenemin, jutaımyn?
Bult kóshedi…Tútini edi ol qazaqtyń –
Tozaǵynda janǵan Kápir-Qytaıdyń!
Júrek laýlap, til lapyldap, qozdy urtym,
Júrgen jendet toıdyra almaı kóz qurtyn
Búldirshinin tastaı salad otqa úıtip,
Ol sebebi oqqa qıǵan – óz jurtyn!
Eı, Er Qazaq, eske ap baǵzy Sertińdi,
Jaz dertińdi, ash nursıpat-kórkińdi.
Óziń qorǵa óz kentińdi! –Kórdiń ǵoı:
Órt ishinde botań janyp jatsa da,
Órt ishinde Otan janyp jatsa da,
Eshkim kelip sóndirmeıdi órtińdi!
Qorǵamasań, – tekke ketpes bul qurban,
Iziń-tozyń joǵalady tul qyrdan…
…Qabirińde –Qaýyzynan jas tóger
Bes qyzǵaldaq – órt ishinde shyńǵyrǵan!..
