ليتۆا پرەمەر-ءمينيسترى جانە سوتسيال-دەموكراتيالىق پارتياسىنىڭ توراعاسى گينتاۋتاس پالۋكاس جەمقورلىققا بايلانىستى داۋلى وقيعالاردان كەيىن ەكى لاۋازىمىنان دا كەتەتىنىن مالىمدەدى، دەپ حابارلايدى "ادىرنا" ۇلتتىق پورتالى.
پالۋكاس 2024 جىلدىڭ جەلتوقسانىندا پرەمەر-مينيستر قىزمەتىنە تاعايىندالعان بولاتىن. الايدا مامىر ايىنىڭ سوڭىندا Laisvės TV YouTube ارناسى مەن Siena جۋرناليستىك زەرتتەۋ ورتالىعى بىرلەسىپ جۇرگىزگەن تەكسەرۋ ناتيجەلەرى قوعامدا ۇلكەن رەزونانس تۋعىزدى. تەرگەۋ بارىسىندا پالۋكاستىڭ بۇرىن ءوزى قۇرعان Granis كومپانياسىنىڭ مەملەكەتتىك ILTE دامۋ بانكىنەن 200 مىڭ ەۋرو كولەمىندە جەڭىلدەتىلگەن نەسيە العانى بەلگىلى بولدى. ول كەزدە پالۋكاس پرەمەر-مينيستر قىزمەتىندە بولعان.
سونىمەن قاتار، ول باسقارعان Sagerta كومپانياسى Uni Trading كومپانياسىنان جۇزدەگەن مىڭ ەۋرو نەسيە الىپ، ونى قايتارماعان دەگەن كۇدىككە ءىلىندى. اتالعان كومپانيانىڭ ارتىندا كاسىپكەر داريۋش ۆيلچينسكي تۇرعانى اتاپ ءوتىلدى. بۇدان بولەك، 2012 جىلى پالۋكاس سول كاسىپكەردىڭ كومپانياسىنان 223 مىڭ ەۋروعا ءۇي ساتىپ العان دەگەن دەرەك تە جاريالاندى.
داۋعا پالۋكاستىڭ اپكەسى باسقاراتىن Dankora كومپانياسى دا ءىلىندى. كومپانيا ەو-دان 200 مىڭ ەۋرو كولەمىندە نەسيە الىپ، Garni كومپانياسىنان جابدىق ساتىپ العانى بەلگىلى بولدى.
جۋرناليستىك زەرتتەۋ جاريالانعاننان كەيىن ليتۆاداعى قىزمەتتىك ەتيكا جونىندەگى كوميسسيا وزدىگىنەن تەرگەۋ جۇمىستارىن باستاپ كەتتى. پالۋكاس باستاپقىدا بارلىق ايىپتاۋلاردى جوققا شىعارىپ، مۇنى «ساياسي باسەكەلەستەردىڭ شابۋىلى» دەپ اتاعان.
24 شىلدەدە ليتۆا پرەزيدەنتى پالۋكاستان حالىقتىڭ سۇراقتارىنا جاۋاپ بەرىپ، بولاشاعى تۋرالى ويلانىپ كورۋ ءۇشىن ەكى اپتا دەمالىس الۋدى سۇرادى. پالۋكاس بۇل ءۇزىلىستى «الدىن الا جوسپارلانعان دەمالىس» دەپ اتاعان بولاتىن.
الايدا اراعا ەكى اپتا سالىپ، ول پرەمەرلىك قىزمەتىنەن دە، پارتيا توراعالىعىنان دا كەتۋ تۋرالى شەشىم قابىلدادى.
