ورتالىق سايلاۋ كوميسسياسى Respublica پارتياسىنىڭ ءماجىلىس سايلاۋىنا ۇسىنعان تىزىمىنەن ەكى ادامدى شىعاردى. بۇل تۋرالى قازاقپارات حابارلادى، دەپ جازادى “ادىرنا” ۇلتتىق پورتالى.
«Respublica پارتياسى 25 ادامنان تۇراتىن پارتيالىق ءتىزىمدى ۇسىندى. ورتالىق سايلاۋ كوميسسياسى وكىلەتتى مەملەكەتتىك ورگاندارمەن بىرلەسىپ، ءماجىلىس دەپۋتاتى بولىپ سايلانۋ ءۇشىن پارتيالىق تىزىمگە ەنگىزىلگەن ادامداردىڭ كونستيتۋتسيا مەن «سايلاۋ تۋرالى» كونستيتۋتسيالىق زاڭنىڭ تالاپتارىنا سايكەستىگىنە تەكسەرۋ جۇرگىزدى. سونىمەن قاتار، ورتالىق سايلاۋ كوميسسياسىندا ەكى كانديداتتان ولاردى وسى پارتيانىڭ پارتيالىق تىزىمىنەن ءوز ەركىمەن شىعارۋ تۋرالى ءوتىنىشى رەسمي تۇردە تىركەلدى. دارحان سەرىكۇلى يماناشەۆتىڭ 10 اقپانداعى جانە ولجاس ابازۇلى سۇلتانوۆتىڭ 11 اقپانداعى ءوتىنىشى قر ورتالىق سايلاۋ كوميسسياسىنا 14 اقپاندا كەلىپ ءتۇستى. «سايلاۋ» تۋرالى قر كونستيتۋتسيالىق زاڭىنىڭ 90-بابىنىڭ 1-تارماعىنا سايكەس، Respublica پارتياسى قوعامدىق بەرلەستىگىنىڭ پارتيالىق تىزىمىنەن ولاردىڭ وتىنىشىمەن دارحان سەرىكۇلى يماناشەۆتى، ولجاس ابازۇلى سۇلتانوۆتى شىعارۋ بويىنشا وسك ءوز قۇزىزرەتى شەڭبەرىندە ءتيىستى شەشىمدەر جوباسىن دايىندادى»، - دەدى وسك مۇشەسى شاۆكات وتەمىسوۆ.
ەسكە سالساق، Respublica پارتياسىنان ءماجىلىس دەپۋتاتتىعىنا ۇمىتكەرلەر تىزىمىنە 29 ادام ەنگىزىلگەن بولاتىن. الايدا، كەشە ءبىرمانداتتى جۇيە بويىنشا ۇسىنىلعان ۇمىتكەر، پارتيانىڭ تەڭ توراعالارىنىڭ ءبىرى سىرىمبەك تاۋدىڭ تىزىمنەن شەتتەتىلگەنى بەلگىلى بولدى.
”ادىرنا” ۇلتتىق پورتالى
