كۇنى كەشە 6 جىلعا سوتتالعان گاۋھار الىمبەكوۆانىڭ وقيعاسى ءدۇيىم قازاق قوعامىن ءدۇر سىلكىندىردى. ونەر ادامدارى جاپپاي اباقتىعا جابىلعان انشىگە قولداۋ ءبىلدىرىپ جاتىر. ال الەۋمەتتىك جەلىدە الىمبەكوۆانىڭ ەلباسى نۇرسۇلتان نازارباەۆقا جازعان حاتى جاريالاندى. ونەر يەسى جالانىڭ قۇربانىنا اينالعانىن ايتىپ، نۇرسۇلتان ءابىشۇلىنان جەلتوقسان ايىندا اراشا سۇراعان.
حاتتا الىمبەكوۆا كۇنى كەشە وزىمەن بىرگە سوتتالعان فەرۋزا ورداباەۆاعا الدانىپ قالعانىن ايتادى.
“ورالباەۆا فەرۋزا اتتى ازاماتشانى 2009 جىلدان بەرى تانيتىن ەدىم. ۇنەمى كونتسەرتتەرىمە كەلىپ جۇرەتىن، ونەرىمە ءتانتى جانداردىڭ ءبىرى بولعاندىقتان، كەيىن ءبىر-ءبىرىمىزدىڭ جيىن-تويلارىمىزعا قاتىسىپ، ارالاستىعىمىز ارتا ءتۇستى. “ادام الاسى ىشىندە” دەيدى عوي، قانشا ۋاقىت تانىسام دا، ول كىسىنىڭ انىق قانداي ەكەنىن تۇسىنبەپپىن”، – دەپ جازعان الىمبەكوۆا.
ايتۋىنشا، ازاماتشا ورداباەۆا 2013 جىلى اكىمدىكتە تانىسى بارىن ايتىپ، مەملەكەتتىك باعدارلاما ارقىلى الماتىداعى “اقكەنت” تۇرعىن ءۇي كەشەنىنەن ءۇي الىپ بەرۋگە كومەكتەسەتىنىن ايتقان. ءانشى 40-تىڭ بەل ورتاسىنا دەيىن باسپاناسىز جۇرگەنىن، سوندىقتان دا وسى مۇمكىندىكتى پايدالانباق بولعانىن جەتكىزگەن. ول اعاسىمەن بىرىگىپ ورداباەۆاعا 80 مىڭ اقش دوللارىن ۇستاتقان. ول ازداي، قانشا جىلدان بەرى ارالاسىپ جۇرگەن قۇربىسى باقىت نازاروۆاعا دا وسىنداي مۇمكىندىكتىڭ بارىن ايتقان. ەكەۋى دە كەلىسىلگەن پاتەرگە يە بولعان. الايدا ەكى جىلدان كەيىن ورداباەۆانىڭ پاتەردى زاڭسىز جولمەن اپەرگەنى انىقتالىپ، گاۋھار الىمبەكوۆا دا، ونىڭ قۇربىسى دا دالادا قالعان.
سان سوعىپ قالعانداردىڭ ءبىرى باقىت نازاروۆا ورداباەۆانى جاقسى تانىمايتىنىن العا تارتىپ، بۇل ىسكە الىمبەكوۆانى كىنالاي باستاعان. اقىرىندا سوتقا دەيىن بارعان.
“اسا قادىرمەندى ەلباسى، مەنى تىعىرىققا تۇسىرگەن وسى ماسەلە بويىنشا ماعان اراشا ءتۇسۋىڭىزدى سۇرايمىن. ءسىزدىڭ ساليقالى ساياساتىڭىزدى اياقاستى ەتىپ، جان ۇشىنان جالعاسقان جەمقورلىققا جول بەرگەندەردىڭ زاڭ الدىندا جاۋاپ بەرگەنىن قالايمىن. قۇقىق قورعاۋ ورگاندارى ءادىل زاڭ اياسىندا شەشىم شىعارىپ، ناعىز الاياق ءادىل جازاسىن الادى دەپ ۇمىتتەنەمىن.
مەنىڭ ەندىگى ءۇمىتىم – تەك سىزدە! مەن سىزگە “مەنى قالايدا اقتاپ الىڭىز” دەمەيمىن. تەك ءىستىڭ اق-قاراسىن ايىرىپ، ادىلدىكتىڭ سالتانات قۇرۋىن ءوز باقىلاۋىڭىزعا الساڭىز بولعانى. بۇكىل ەلگە تانىمال ءانشىنى ەش دالەلسىز كۇدىكتى دەپ تانۋعا، زاڭسىز قۋدالاۋعا جول بەرمەسەڭىز ەكەن”، – دەپ تۇيىندەگەن حاتىن الىمبەكوۆا.
حاتتىڭ تولىق نۇسقاسىمەن تومەننەن تانىسا الاسىز!
ەسكە سالا كەتەيىك، كۇنى كەشە گاۋحار الىمبەكوۆانىڭ الاياقتىق ءۇشىن 6 جىلعا باسچ بوستاندىعىنان ايىرىلدى. وتاندىق جۇلدىزدار ارىپتەسىنە قولداۋ بىلدىرۋدە.
