Kúni keshe 6 jylǵa sottalǵan Gaýhar Álimbekovanyń oqıǵasy dúıim qazaq qoǵamyn dúr silkindirdi. Óner adamdary jappaı abaqtyǵa jabylǵan ánshige qoldaý bildirip jatyr. Al áleýmettik jelide Álimbekovanyń elbasy Nursultan Nazarbaevqa jazǵan haty jarııalandy. Óner ıesi jalanyń qurbanyna aınalǵanyn aıtyp, Nursultan Ábishulynan jeltoqsan aıynda arasha suraǵan.
Hatta Álimbekova kúni keshe ózimen birge sottalǵan Ferýza Ordabaevaǵa aldanyp qalǵanyn aıtady.
“Oralbaeva Ferýza atty azamatshany 2009 jyldan beri tanıtyn edim. Únemi konertterime kelip júretin, ónerime tánti jandardyń biri bolǵandyqtan, keıin bir-birimizdiń jıyn-toılarymyzǵa qatysyp, aralastyǵymyz arta tústi. “Adam alasy ishinde” deıdi ǵoı, qansha ýaqyt tanysam da, ol kisiniń anyq qandaı ekenin túsinbeppin”, – dep jazǵan Álimbekova.
Aıtýynsha, azamatsha Ordabaeva 2013 jyly ákimdikte tanysy baryn aıtyp, memlekettik baǵdarlama arqyly Almatydaǵy “Aqkent” turǵyn úı kesheninen úı alyp berýge kómektesetinin aıtqan. Ánshi 40-tyń bel ortasyna deıin baspanasyz júrgenin, sondyqtan da osy múmkindikti paıdalanbaq bolǵanyn jetkizgen. Ol aǵasymen birigip Ordabaevaǵa 80 myń AQSh dollaryn ustatqan. Ol azdaı, qansha jyldan beri aralasyp júrgen qurbysy Baqyt Nazarovaǵa da osyndaı múmkindiktiń baryn aıtqan. Ekeýi de kelisilgen páterge ıe bolǵan. Alaıda eki jyldan keıin Ordabaevanyń páterdi zańsyz jolmen ápergeni anyqtalyp, Gaýhar Álimbekova da, onyń qurbysy da dalada qalǵan.
San soǵyp qalǵandardyń biri Baqyt Nazarova Ordabaevany jaqsy tanymaıtynyn alǵa tartyp, bul iske Álimbekovany kinálaı bastaǵan. Aqyrynda sotqa deıin barǵan.
“Asa qadirmendi Elbasy, meni tyǵyryqqa túsirgen osy másele boıynsha maǵan arasha túsýińizdi suraımyn. Sizdiń salıqaly saıasatyńyzdy aıaqasty etip, jan ushynan jalǵasqan jemqorlyqqa jol bergenderdiń zań aldynda jaýap bergenin qalaımyn. Quqyq qorǵaý organdary ádil zań aıasynda sheshim shyǵaryp, naǵyz alaıaq ádil jazasyn alady dep úmittenemin.
Meniń endigi úmitim – tek Sizde! Men sizge “meni qalaıda aqtap alyńyz” demeımin. Tek istiń aq-qarasyn aıyryp, ádildiktiń saltanat qurýyn óz baqylaýyńyzǵa alsańyz bolǵany. Búkil elge tanymal ánshini esh dálelsiz kúdikti dep tanýǵa, zańsyz qýdalaýǵa jol bermeseńiz eken”, – dep túıindegen hatyn Álimbekova.
Hattyń tolyq nusqasymen tómennen tanysa alasyz!
Eske sala keteıik, kúni keshe Gaýhar Álimbekovanyń alaıaqtyq úshin 6 jylǵa basch bostandyǵynan aıyryldy. Otandyq juldyzdar áriptesine qoldaý bildirýde.
