الگىندە عانا ەستىگەن مىنا حاباردان جانىم تۇرشىگىپ، ءالى ءوز-وزىمە كەلە الار ەمەسپىن. ءبىر ويىم "بۇل مۇمكىن ەمەس، اقپاراتتىق تەحنولوگيا دامىعان داۋىردە استانانىڭ تۇبىندەگى وقيعانى جۋرناليستەر قالايشا قالت جىبەردى؟" دەپ مەنى سابىرعا شاقىرسا، ەكىنشى ويىم "بۇل وقيعانى دەرەۋ حالىققا جەتكىز! بالالاردى قورقاۋ قاتىننىڭ قۇرساۋىنان قۇتقارسىن!" - دەپ تىنىم تاپتىرماي، جانىمدى جەگىدەي جەپ بارادى.
باسىنان باستاسام، قورلىقتا جۇرگەن بالالاردىڭ اۋىر جاعدايىن جەتكىزگەن ادامدى جاقسى تانيمىن. ول - ەكىباستۇز وڭىرىنە سىيلى ادام. يمانى بەرىك، نامازعا جىعىلادى. وتباسىنىڭ ۇيىتقىسى. ادال جار، اياۋلى انا، باۋىرلارىنىڭ قامقورشىسى. "ماعان ايتقان اڭگىمەڭىزدى تاعى كىم ەستىدى؟" - دەپ سۇراپ ەدىم: "يمامنىڭ ايەلى. ءبىز وعان بالالار ءۇيى ورنالاسقان اۋىلدىڭ يمامىنا شىعىپ، ءمان-جايدى انىقتاڭىزدار، قاجەت بولسا، يمام جەتكىنشەكتەرگە كومەك قولىن سوزسىن دەپ ەدىك، "بۇل ولاردىڭ ىشكى ماسەلەسى" دەپ اياعىن باسپادى. كۇيەۋى قازىر الىس ساپاردا", - دەدى تانىسىم نالىپ.
تانىسىمنىڭ تۋىسى (ول كىسىنى مەن دە جاقسى تانيمىن) استانا قالاسىندا تۇرادى. بىرەر جىل استاناعا جاقىن اۋىلداردىڭ بىرىندەگى مەكتەپتە بالالار ءۇيىنىڭ تاربيەلەنۋشىلەرىنە ساباق بەرىپتى. بالالار ءۇيىنىڭ ديرەكتورى - ايەل، ۇلتى ورىس. جەكە شارۋاشىلىعى بار. تانىسىمنىڭ ايتۋىنشا، داۋلەتتى ايەل الگى جەتىمەكتەردى باسىبايلى قۇلىنا اينالدىرعان. ءتۇننىڭ بىرۋاعىندا قالجىراپ كەلىپ، توسەكتەرىنە قۇلايتىن بالالاردىڭ بۇل كۇندە ساباق وقۋعا قۇلقى دا، ۋاقىتتارى دا جوق ەكەن. "بالالاردى ابدەن ۇرەي بيلەپ العان. ۇنەمى شارشاپ-شالدىعىپ جۇرەدى. كەي كۇندەرى دەنەلەرىنەن كوگەرگەن داقتى كوزىم شالىپ قالادى", دەپتى مۇعالىم. سۋىرتپاقتاپ سۇراسا، زارەزاپ بولعان جەتكىنشەكتەر جۇمعان اۋىزدارىن اشپايدى ەكەن.
ول ول ما، ەسىرگەن ديرەكتور بىردە قازاق بالالارىن شىركەۋدىڭ ءدىني قىزمەتكەرىنە اپارىپ "مىنالاردى شوقىندىر" دەگەن عوي. پوپ بىردەن باس تارتىپتى: "بالا قاي دىنگە كىرەتىنىن 15-16 جاستان باستاپ ءوزى تاڭداۋى ءتيىس. ءالى وڭ-سولىن تانىماعان بالالاردى ماجبۇرلەپ حريستيان دىنىنە كىرگىزە المايمىن". پوپتىڭ بۇل ءسوزى دولى قاتىننىڭ شامىنا ءتيىپ، ول ەندى بالالارعا ءوز بەتىنشە ءدىني ءدارىس بەرۋگە كوشىپتى. "مەنىڭ دەنەمنىڭ ساۋ تامتىعى جوق. ءدىني سوزدەر جاتتاۋعا قيىن دەپ ەدىم، ۇرىپ-سوقتى",- دەپ بالالاردىڭ ءبىرى مۇعالىمىنە مۇڭىن شاعىپتى.
"وسى ۋاقىتقا دەيىن بىردە-ءبىر بالا نەمەسە قىزمەتكەر ديرەكتوردىڭ ۇستىنەن شاعىمدانباعان با؟" - دەگەن ساۋالىمىزعا، تانىسىم: "نەگە شاعىمدانباسىن. تالاي رەت جوعارى جاققا ارىز جازعان عوي. ارىزعا بايلانىستى بىرنەشە رەت كوميسسيا شىعىپ، تەكسەرۋ جۇرگىزگەن. "باسى اۋىرماستىڭ قاسىندا جانى اشىماس" دەمەكشى، تەكسەرۋشىلەر ء"بارى قالىپتى" دەپ، جابۋلى قازاندى جابۋلى كۇيىندە قالدىرعان. بىلەتىندەر ديرەكتوردىڭ "كرىشاسى" جوعارىدا وتىرعانىن ايتادى", - دەيدى تانىسىم ءتۇڭىلىپ.
"بالالاردىڭ ادام توزگىسىز ءومىرىن ارى قاراي كورۋگە جۇرەگىم شىدامادى. 2018 جىلدىڭ شىلدە ايىندا ءوز ەركىممەن جۇمىستان شىعىپ كەتتىم", دەپتى مۇعالىم تانىسىما.
اڭگىمەنىڭ ۇزىن-ىرعاسى وسى.
P.S. ءبىزدىڭ انىقتاعانىمىزداي بۇل جەتىم بالالار ءۇيى مالايا تيموفەەۆكا سەلوسىندا ورنالاسقان. سۆەتوچ بالالار ءۇيى دەپ اتالادى ەكەن. بالالاردى شوقىندىرماق بولعانىن ەستىدىك دەيدى اۋىل تۇرعىندارى. بىزدەگى بار اقپارات وسى.
داريا ەرعازينانىڭ فەيسبۋكتەگى پاراقشاسىنان
