Álginde ǵana estigen myna habardan janym túrshigip, áli óz-ózime kele alar emespin. Bir oıym "bul múmkin emes, aqparattyq tehnologııa damyǵan dáýirde Astananyń túbindegi oqıǵany jýrnalıster qalaısha qalt jiberdi?" dep meni sabyrǵa shaqyrsa, ekinshi oıym "Bul oqıǵany dereý halyqqa jetkiz! Balalardy qorqaý qatynnyń qursaýynan qutqarsyn!" - dep tynym taptyrmaı, janymdy jegideı jep barady.
Basynan bastasam, qorlyqta júrgen balalardyń aýyr jaǵdaıyn jetkizgen adamdy jaqsy tanımyn. Ol - Ekibastuz óńirine syıly adam. Imany berik, namazǵa jyǵylady. Otbasynyń uıytqysy. Adal jar, aıaýly ana, baýyrlarynyń qamqorshysy. "Maǵan aıtqan áńgimeńizdi taǵy kim estidi?" - dep surap edim: "Imamnyń áıeli. Biz oǵan Balalar úıi ornalasqan aýyldyń ımamyna shyǵyp, mán-jaıdy anyqtańyzdar, qajet bolsa, ımam jetkinshekterge kómek qolyn sozsyn dep edik, "Bul olardyń ishki máselesi" dep aıaǵyn baspady. Kúıeýi qazir alys saparda", - dedi tanysym nalyp.
Tanysymnyń týysy (ol kisini men de jaqsy tanımyn) Astana qalasynda turady. Birer jyl Astanaǵa jaqyn aýyldardyń birindegi mektepte Balalar úıiniń tárbıelenýshilerine sabaq beripti. Balalar úıiniń dırektory - áıel, ulty orys. Jeke sharýashylyǵy bar. Tanysymnyń aıtýynsha, dáýletti áıel álgi jetimekterdi basybaıly qulyna aınaldyrǵan. Túnniń birýaǵynda qaljyrap kelip, tósekterine qulaıtyn balalardyń bul kúnde sabaq oqýǵa qulqy da, ýaqyttary da joq eken. "Balalardy ábden úreı bılep alǵan. Únemi sharshap-shaldyǵyp júredi. Keı kúnderi denelerinen kógergen daqty kózim shalyp qalady", depti muǵalim. Sýyrtpaqtap surasa, zárezap bolǵan jetkinshekter jumǵan aýyzdaryn ashpaıdy eken.
Ol ol ma, esirgen dırektor birde qazaq balalaryn shirkeýdiń dinı qyzmetkerine aparyp "mynalardy shoqyndyr" degen ǵoı. Pop birden bas tartypty: "Bala qaı dinge kiretinin 15-16 jastan bastap ózi tańdaýy tıis. Áli oń-solyn tanymaǵan balalardy májbúrlep hrıstıan dinine kirgize almaımyn". Poptyń bul sózi doly qatynnyń shamyna tıip, ol endi balalarǵa óz betinshe dinı dáris berýge kóshipti. "Meniń denemniń saý tamtyǵy joq. Dinı sózder jattaýǵa qıyn dep edim, uryp-soqty",- dep balalardyń biri muǵalimine muńyn shaǵypty.
"Osy ýaqytqa deıin birde-bir bala nemese qyzmetker dırektordyń ústinen shaǵymdanbaǵan ba?" - degen saýalymyzǵa, tanysym: "Nege shaǵymdanbasyn. Talaı ret joǵary jaqqa aryz jazǵan ǵoı. Aryzǵa baılanysty birneshe ret komıssııa shyǵyp, tekserý júrgizgen. "Basy aýyrmastyń qasynda jany ashymas" demekshi, tekserýshiler "bári qalypty" dep, jabýly qazandy jabýly kúıinde qaldyrǵan. Biletinder dırektordyń "kryshasy" joǵaryda otyrǵanyn aıtady", - deıdi tanysym túńilip.
"Balalardyń adam tózgisiz ómirin ary qaraı kórýge júregim shydamady. 2018 jyldyń shilde aıynda óz erkimmen jumystan shyǵyp kettim", depti muǵalim tanysyma.
Áńgimeniń uzyn-yrǵasy osy.
P.S. Bizdiń anyqtaǵanymyzdaı bul jetim balalar úıi Malaıa Tımofeevka selosynda ornalasqan. Svetoch balalar úıi dep atalady eken. Balalardy shoqyndyrmaq bolǵanyn estidik deıdi aýyl turǵyndary. Bizdegi bar aqparat osy.
Darııa Erǵazınanyń Feısbýktegi paraqshasynan
