قاڭتار وقيعاسىنان كەيىن قاماۋدا ازاپتالىپ ولتىرىلگەن الماس مۇقاشەۆتىڭ ءىسى بويىنشا ۇلتتىق قاۋىپسىزدىك قىزمەتىنىڭ ەكى قىزمەتكەرى سوتتالدى. بۇل تۋرالى قالالىق سوتتىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
«2022 جىلدىڭ 8 قاڭتارىندا قالالىق پوليتسيا عيماراتىندا سوتتالۋشىلاردىڭ ءبىرى ۇستالعان ادامعا دەنە جاراقاتىن سالعان. سالدارىنان ادام قايتىس بولعان. سوتتالۋشى س. وسى اۋىر قىلمىستىڭ جاساۋ فاكتىسىن جاسىرعان»،—دەلىنگەن حابارلامادا.
سوتتالۋشىلاردىڭ كىناسى ءىس بويىنشا جينالعان ايعاقتارمەن، كۋالاردىڭ جاۋاپتارىمەن جانە سوت ساراپتاماسىنىڭ قورىتىندىسىمەن دالەلدەندى.
«سوت ۇكىمىمەن سوتتالۋشى ب. قىلمىستىق كودەكستىڭ 146-بابىنىڭ 3-بولىگى بويىنشا كىنالى دەپ تانىلدى جانە وعان 10 جىل مەرزىمگە باس بوستاندىعىنان ايىرۋ جازاسى تاعايىندالدى. ال سوتتالۋشى س.-عا 432-باپ بويىنشا 4 جىلعا باس بوستاندىعىن شەكتەۋ جازاسى تاعايىندالدى. سوتتالعانداردان جابىرلەنۋشى تاراپتىڭ پايداسىنا مورالدىق زالال كەلتىرگەنى ءۇشىن 15 ميلليون تەڭگە ءوندىرىلدى»،—دەپ جازدى سوتتىڭ ءباسپاسوز قىزمەتى.
ايتا كەتەيىك، سوت ۇكىمى زاڭدى كۇشىنە ەنگەن جوق.
