قازاقستان كومانداسى روبوتەحنيكادان پاناما-سيتيدە وتكەن دۇنيەجۇزىلىك وليمپيادادا جۇزدەن جۇيرىك شىعىپ، جەڭىس تۇعىرىنان كورىندى. بۇل تۋرالى حابار 24 جازدى، دەپ حابارلايدى «ادىرنا» ۇلتتىق پورتالى.
ارنا مالىمەتىنشە، تۇڭعىش رەت ەل قورجىنى 2 كۇمىس، 4 قولا مەدالمەن تولىقتى. سايىسقا الەمنىڭ 81 ەلىنىڭ ورەندەرى قاتىستى. دۇنيەجۇزىلىك دوداعا قازاقستان كومانداسى بيىل وسىمەن 5-ءشى رەت قاتىستى.
ۇلتتىق قۇراما ساپىندا ەل نامىسىن تايلاند، ۆەنگريا جانە گەرمانيادا وتكەن وليمپيادالاردا جۇزدەن جۇيرىك شىققان جاس ورەندەر قورعادى.
جانارىس قاپاروۆ، جارىس جۇلدەگەرى:
– بۇل مەنىڭ وسىنداي حالىقارالىق سايىسقا 2-ءشى رەت كەلۋىم. وسىعان دەيىن دورتمۋندا بولعان سايىسقا قاتىستىم. شىنىمدى ايتسام، بيىل ءوزىمدى ەركىن ءارى سەنىمدى ۇستادىم. جارىستىڭ 1-ءشى كۇنى-اق جاقسى ناتيجە كورسەتتىم. جالپى روبوتەحنيكادا ەڭ باستىسى، لوگيكاڭ مىقتى بولۋ كەرەك.
– روبوتەحنيكا ەلىمىزدە ەندى عانا قاناتىن جايىپ كەلەدى. قىزىعاتىندار جىل ساناپ ارتىپ جاتىر. اسىرەسە مەكتەپ وقۋشىلارىنىڭ اراسىندا كەڭىنەن تانىمال. پاناماداعى جەڭىس – سونىڭ جەمىسى، – دەيدى قازاقستاندىق باپكەر.
ميراس مۇراتحانوۆ، قازاقستان قۇراماسىنىڭ باپكەرى:
– الەمنىڭ تۇكپىر-تۇكپىرىنەن كەلگەن مىڭداعان وقۋشىلار، بارلىعى وسى ءبىر وليمپيادا ءۇشىن، بارلىعى ءبىر وسى ماقسات ءۇشىن، بارلىعى ءبىر باسەكە ءۇشىن كەلىپ وتىر جانە بۇل مەن ءۇشىن وتە اسەرلى بولىپ كەلەدى. حالىقارالىق سايىستا قازاقستان تاراپى اقش، قىتاي جانە ازەربايجاننىڭ تانىمال روبوتوتەحنيكا مەكتەپ كلۋبتارىمەن بىرلەسىپ جۇمىس ىستەۋگە ءوزارا مەموراندۋمعا قول قويدى.
ۋيليام ۋونگ، سايىستى ۇيىمداستىرۋشى:
- الداعى ۋاقىتتا قازاقستانمەن بىرگە جۇمىس ىستەۋگە نيەتتىمىز. سەبەبى قازاقستاندىق وقۋشىلار وتە تالانتتى. بۇگىنگى جارىستا ءبىزدى ءتانتى ەتتى. تسيفرلىق تەحنولوگيا، جاساندى ينتەللەكت – بۇگىنگى زامان تالابى.
جەرلەستەرىمىز قازاقستاندى جاھاندىق IT كەڭىستىكتە ۇزدىك تانىتىپ، ەلىمىزدە الەمدىك ستاندارتقا ساي جوبالار جاساۋعا لايىقتى ەكەنىن تاعى ءبىر دالەلدەدى.
«ادىرنا» ۇلتتىق پورتالى
