جۋرناليستەردى قولداۋ قورى قۇرىلدى. بۇل تۋرالى حابار اگەنتتىگىنىڭ باسقارما توراعاسى بەرىك ءۋالي مالىمدەدى، دەپ حابارلايدى “ادىرنا” ۇلتتىق پورتالى.
«ءبىزدىڭ ارىپتەستەر، تىلشىلەردىڭ تىنىمسىز تىرشىلىگى تۋرالى ايتقاندا، ءبىرىنشى كەزەكتە شەراعاڭنىڭ قاناتتى ءسوزى ەسكە تۇسەدى. قايتالاپ جاتپايىن، ونى ءبارىڭىز دە بىلەسىزدەر. راسىندا، 1 جارىم مينۋتتىق سيۋجەتكە، ءبىر تۇششىمدى ماقالا مەن راديوحابار ءۇشىن جۋرناليست كۇنى بويى تىرنەكتەپ ماتەريال جينايدى، تاراپتاردى تىڭدايدى، جان-جاقتى مالىمەت الادى، ت.ب.. سول جۇمىستار كەزىندە جۋرناليستەن بولەك كوزگە كورىنبەيتىن قانشاما مامان جۇمىس ىستەيدى. رەجيسسەر، وپەراتور، جارىق ءتۇسىرۋشى، مونتاج ينجەنەرى، گريميور، دىبىس رەجيسسەرى، ديزاينەر، بەت قاتتاۋشى، كونتەنت-مەنەدجەر ءتىپتى كولىك جۇرگىزۋشىسىنە دەيىن ەفيرگە شىعاتىن تەلە-راديو ونىمدەر مەن گازەت، جۋرنال، سايتتا جارىق كورەتىن دۇنيەنىڭ ءار مينۋتى، ءار ءارپى ءۇشىن جان اياماي جۇمىس ىستەيدى. بۇلاردىڭ ءبارى – ءبىر سوزبەن ايتقاندا باق قىزمەتكەرلەرى.
مىنە، سول باق سالاسىندا ايانباي ەڭبەك ەتىپ جۇرگەن ارىپتەستەرگە اقجولتاي جاڭالىعىمدى جەتكىزگىم كەلەدى. ەلوردادا «جۋرناليستەردى قولداۋ قايىرىمدىلىق قورى» قۇرىلدى. بۇل بىلتىر كوكتەمدە باستالعان جۇمىس ەدى، جاقىندا رەسمي تىركەلىپ، قۇجاتىمىز قولىمىزعا ءتيدى»، - دەدى ول.
قوردىڭ جۇمىسى از قامتىلعان وتباسىلاردان شىققان جاس جۋرناليستەردىڭ، جالعىزباستى جانە كوپبالالى جۋرناليستەردىڭ ماتەريالدىق جاعدايىن جاقسارتۋعا، جاس مامانداردىڭ جۇمىسقا ورنالاسۋىنا جاردەمدەسۋگە، باسپانا ماسەلەسىنىڭ شەشىلۋىنە ىقپالداسۋعا جانە قۇقىقتىق كومەك كورسەتۋگە باعىتتالعان.
«سونىمەن قاتار، اتالعان ۇيىم جۋرناليستەردىڭ بەدەلىن ارتتىرۋ، كاسىبي-شىعارماشىلىق مۇددەسىن، اۆتورلىق جانە ساباقتاس قۇقىقتارىن، ار-نامىسىن، ىسكەرلىك بەدەلىن قورعاۋ، ەڭبەك، تۇرمىس جانە دەمالىس جاعدايلارىن جاقسارتۋ، ارداگەر جۋرناليستەرگە ءتيىستى دەڭگەيدە قۇرمەت كورسەتۋ ماقساتىمەن كاسىپتىك وداقتارمەن ىنتىماقتاستىق ورناتۋدى دا جوسپارلاپ وتىر.
وسى ورايدا، العاشقى قادامدار دا جاسالدى. ناتيجەسىن الداعى ۋاقىتتا جاريا ەتەمىز.
ارىپتەستەرىمىزدىڭ قانداي دا ءبىر وتىنىشتەرىن بىلىكتى ارداگەر جۋرناليستەر مەن قوعام بەلسەندىلەرىنەن قۇرىلعان ارنايى كوميسسيا قارايتىن بولادى.
الداعى ۋاقىتتا ۇيىمنىڭ جۇمىسى تۋرالى قوسىمشا حابارلاپ وتىراتىن بولامىز»، - دەدى بەرىك ءۋالي.
