بۇگىن 31 قاڭتار ادىلدىك جولىندا قۇربان بولعان حالىق باتىرى ارون اتابەكتىڭ تۋعان كۇنى. ديسسەدەنت اقىننىڭ قىزى الما ارونقىزى قاسىم-جومارت توقاەۆقا ۇندەۋ تاستاپ، شاڭىراق وقيعاسى بويىنشا ءىستى قايتا قاراپ، اكەسىن تولىق اقتاۋدى تالاپ ەتتى. بۇل تۋرالى "ادىرنا" ۇلتتىق پورتالى جازادى.
"بۇگىن مەنىڭ مارقۇم اكەم ارون اتابەكتىڭ تۋعان كۇنى. ول كوزى ءتىرى بولعاندا، 70 جاسقا تولار ەدى. اياۋسىز ولتىرگەندىكتەن، ءوزىنىڭ مەرەيتويىنا جەتە المادى. مەنىڭ ۇندەۋىم پرەزيدەنت قاسىم-جومارت توقاەۆ مىرزاعا جەتۋى ءۇشىن وسى بەينەجازبانى بارىنشا تاراتۋلارىڭىزدى سۇرايمىن. قۇرمەتتى قاسىم-جومارت كەمەلۇلى! مەن وزىڭىگە تاعى دا جۇگىنىپ وتىرمىن. الدىڭعى وتىنىشىمە قر ءىىم، پروكۋراتۋرا جانە قر ءىىم قاجك اتىنان سىرعىتپا جاۋاپتار عانا الدىم. ولار مەنىڭ اكەم قايتىس بولعاننان كەيىن اقتالمايدى، ءىس جابىلدى جانە ول باس بوستاندىعىنان ايىرۋ ورىندارىنداعى تۇزەۋ مەكەمەسىنىڭ جاعدايىنا شاعىمدانبادى دەپ ايتادى. الايدا، بۇكىل قازاقستان ولاردىڭ اكەمدى قانداي مۇشكىل جاعدايدا ءولۋ ءۇشىن بوساتقاندارىن كوردى. ول بوستاندىققا ناۋقاس، ولۋگە جاقىن جۇدەۋ كۇيدە سالماعى 47 كەلى بولىپ شىقتى. بۇعان قاراماستان ول تولىق اقتالمايىنشا بوساتۋدان باس تارتامىن دەپ ءوز قولىمەن جازدى. قازاقستان حالقى ءۇشىن ارون اتابەك كىم بولعانىن جانە بولاتىنىن ەسكە سالعىم كەلەدى. ول ءوز حالقىن، ءوز جەرلەستەرىن قورعاۋعا شىققان پاتريوت، ناعىز باتىر. سونىڭ ارقاسىندا بۇگىندە 1000 وتباسى باسپانالارىن زاڭداستىرىپ، جىلى ءۇيدىڭ ىشىندە تۇرىپ جاتىر. سونداي-اق اكەم ەلىمىزدىڭ تاريحىنا باعا جەتپەس ۇلەس قوستى. شىعارماشىلىعى حالىقارالىق دەڭگەيدە تانىلعان مادەني قايراتكەر رەتىندە، تالانتتى جازۋشى رەتىندە، اقىن رەتىندە، تۇركىتانۋشى رەتىندە ونىڭ ولەڭدەرى ءومىر ءسۇرىپ كەلەدى جانە ماڭگى ومىرشەڭ بولارى ءسوزسىز. الايدا، مەنىڭ اكەم ءوزىنىڭ 15 جىل عۇمىرىن جەكە كامەرادا وتكىزدى. ونى قورلادى، اشتىق پەن سۋىقپەن ازاپتادى. ونى اياۋسىز سوققىعا شىعىپ، قول-اياعىن سىندىردى. وسىنىڭ بارىنە قاراماستان، مەنىڭ اكەم قايسار رۋحىن ساقتاپ، ءوزىنىڭ ادال ەسىمىن قالپىنا كەلتىرۋدى تالاپ ەتتى. قاسىم-جومارت كەمەلۇلى! مەن سىزگە رەتىندە مۇڭىن شاققان قىز رەتىندە جۇگىنىپ وتىرمىن، ويتكەنى ءسىز دە اكەسىڭ. ءسىزدى مارقۇم اكەمدى قايتىس بولعاننان كەيىن اقتاۋىڭىزدى سۇرايمىن. شاڭىراق وقيعاسى بويىنشا ءىستى قايتا قاراۋعا جىبەرۋدى سۇرايمىن. بۇرىنعى بيلىكتىڭ قاتەلىكتەرىن مويىنداپ، تۇزەتۋلەرىڭىزدى سۇرايمىن",- دەدى الما ارونقىزى.
"ادىرنا" ۇلتتىق پورتالى
