قازاقستان رەسپۋبليكاسى پارلامەنتى ءماجىلىسىنىڭ دەپۋتاتى ەدىل جاڭبىرشين قاڭتار وقيعاسى، ەكسترەميزم، دەپۋتاتتاردىڭ جۇمىسى جانە سايلاۋ جايلى پىكىر ءبىلدىرىپ، ارنايى سۇحبات بەردى، دەپ حابارلايدى "ادىرنا" ۇلتتىق پورتالى "Nursultan Qurman" يۋتۋب-ارناسىنا سىلتەمە كورسەتە وتىرىپ.
قر ءماجىلىسىنىڭ ەكولوگيا ماسەلەلەرى جانە تابيعات پايدالانۋ كوميتەتىنىڭ مۇشەسى، دەپۋتات ەرلان جاڭبىرشين جۋرناليست نۇرسۇلتان قۇرمانعا سۇحبات بەردى. سۇحبات بارىسىندا ەدىل جاڭبىرشين دەپۋتاتتىق ءادىس-ايلا، حالىقتىڭ الدىندا ۇپاي جيناۋ جانە شىنايى حالىق يگىلىگى ءۇشىن ەڭبەك ەتۋ ماسەلەسى، "جاڭا قازاقستان" دەپۋتاتتىق توبىنىڭ ماقسات-مىندەتى، پارتيا جاڭعىرۋى مەن كادرلىق ماسەلە، مەملەكەتتىك ءتىل تاقىرىبىنا قاتىستى كەڭىنەن تولعانىپ، تولىققاندى اڭگىمە ءوربىتتى. ماسەلەن قازىرگى قوعامداعى دەپۋتات بەينەسىنە قاتىستى كەيىپكەر بىلاي دەيدى:
- دەپۋتاتتىڭ نەشە ءتۇرى بار. مىقتى پوپۋليست بولۋى مۇمكىن، بىراق شارۋاعا، ىسكە كەلگەندە - ولاق. نەمەسە بۇيىعى بولۋى مۇمكىن، بىراق ناعىز شارۋانىڭ ادامى. كەي دەپۋتاتتار بار، جۇمىستى دا جاسايدى، ىستەگەن جۇمىسىن دا كورسەتەدى. بۇل جەردەگى باستى فاكتور - ادامنىڭ ىشكى دايىندىعى، ومىرلىك تاجىريبەسى، ءبىلىمى، مىنەزى. دەپۋتات بولۋى ءۇشىن ادام سول قىزمەتكە دايىن بولۋى كەرەك. بۇل - ۇلكەن جاۋاپكەرشىلىك، - دەدى ەدىل جاڭبىرشين.
كەيىننەن ەدىل جاڭبىرشين ءوزىنىڭ ومىرلىك تاجىريبەسىنە سۇيەنە وتىرىپ، ساياسي الاڭعا قادام باسۋداعى سالقىنقاندىلىق ماسەلەسىن قوزعادى:
- پارلامەنتكە بىردەن بارام دەيتىن ماسەلە بولماۋى كەرەك. پارلامەنتكە كەلۋ ءۇشىن دە بالەمباي جىل تاجىريبەدەن ءوتتىم. بەسىنشى تالپىنىستان جەتىنشى شاقىرىلىمعا ءوتتىم. ەكى رەت ماجىلىسكە، ەكى رەت سەناتقا. ونىڭ الدىندا وبلىستىق سايلاۋ ءماسليحاتىنا ءتۇستىم... كوپ جىگىتتەر پرايمەريزبەن كەلدى، مەن دە پارتيالاستاردىڭ قولداۋىمەن تىزىمگە ەندىم. قالاي بولعاندا دا حالىقتىڭ تاڭداۋىنا مۇمكىندىك بەرۋىمىز كەرەك، - دەدى كەيىپكەر.
دەپۋتات مىقتى مەملەكەت بولۋ بارشامىزدىڭ مۇراتىمىزعا اينالۋ كەرەك ەكەنىن دە قاداپ ايتتى.
- ماقسات - قازاقستاندى باقۋاتتى، باي ەلگە اينالدىرۋ. حالقىنا ادال قىزمەت ەتەتىن، حالقىنا بايلىقتى تەڭ ءبولىپ بەرەتىن ءادىل قوعام قۇرۋ. ءبىزدىڭ ماقساتىمىز ناقتى بولاتىن بولسا، ءبىز مادەنيەتتى تۇردە ساياسي باسەكەگە ءتۇسۋىمىز كەرەك. مادەنيەتتى تۇردە ءبىر-بىرىمبەن باسەكەلەسۋىمىز كەرەك... حالىققا ءوز باعدارلامامىزدى ءتۇسىندىرۋىمىز كەرەك. جەكە تۇلعاعا ەمەس، ول تۇلعانىڭ پوزيتسياسىنا، پارتيانىڭ باعدارلاماسىنا ءمان بەرۋىمىز كەرەك، - دەپ ويىن تۇيىندەدى اۆتور.
"ادىرنا" ۇلتتىق پورتالى
