پرەمەر-ءمينيستردىڭ ورىنباسارى التاي كولگىنوۆ اقمولا وبلىسىنا جۇمىس ساپارى اياسىندا «فوستەرلىك وتباسىلار»، «اۋىل اماناتى»، «اۋىلدىق دەنساۋلىق ساقتاۋدى جاڭعىرتۋ»، «جايلى مەكتەپ»، دۋالدى وقىتۋ باعدارلامالارىن جۇزەگە اسىرۋدىڭ بارىسىمەن تانىستى.
ۆيتسە-پرەمەر التاي كولگىنوۆ اقكول اۋدانىندا بالالاردى قولداۋ ورتالىعىندا بولدى، وندا ەلدە العاش رەت «فوستەرلىك وتباسىلار» كاسىبي بالا اسىراپ الۋ وتباسىلارىن قۇرۋ جونىندەگى پيلوتتىق جوبا ىسكە قوسىلدى.
«بۇل – وتە ماڭىزدى جوبا جانە ونى ساپالى ىسكە اسىرۋ ءۇشىن بارلىق كۇش-جىگەرىمىزدى جۇمساۋىمىز قاجەت. ءبىزدىڭ مىندەتىمىز – بالالاردى الەۋمەتتەندىرۋ. اتا-اناسىنىڭ قامقورلىعىنسىز قالعان بالالار، وتباسىندا تۇرىپ تاربيەلەنۋى ءتيىس. وقۋ-اعارتۋ مينيسترلىگى تاراپىنان دا، نورماتيۆتىك بازالار بويىنشا دا قولداۋ كورسەتىلەتىن بولادى», — دەدى ۆيتسە-پرەمەر التاي كولگىنوۆ.
سونداي-اق پرەمەر-ءمينيستردىڭ ورىنباسارى التاي كولگىنوۆ «اۋىلدىق دەنساۋلىق ساقتاۋدى جاڭعىرتۋ» جوباسى اياسىندا اقكول اۋداندىق اۋرۋحاناسىنىڭ قىزمەتىمەن تانىستى. عيمارات كۇردەلى جوندەۋ مەن جاڭعىرتۋدى قاجەت ەتەدى. اقمولا وبلىسىندا ۇلتتىق جوبا اياسىندا مەديتسينالىق-سانيتاريالىق العاشقى كومەك كورسەتۋدىڭ (مساك) 38 وبەكتىسى سالىنادى، بىرقاتار اۋدانارالىق اۋرۋحانادا كۇردەلى جوندەۋ مەن جاڭعىرتۋ جۇمىستارى جۇرگىزىلەدى. سونىمەن قاتار مەديتسينالىق كومەككە قولجەتىمدىلىكتى ارتتىرۋ ماقساتىندا كوكشەتاۋ قالاسىندا 630 ورىنعا ارنالعان كوپبەيىندى وبلىستىق اۋرۋحانا سالىنادى.
جالپى 2023-2025 جىلدارى ەل وڭىرلەرىندە جانە شالعاي اۋىلداردا 650 مساك وبەكتىسى سالىنادى. بيىل مەديتسينالىق-سانيتاريالىق العاشقى كومەك كورسەتۋدىڭ 300-دەن استام وبەكتىسىنىڭ قۇرىلىسى باستالادى، سونداي-اق 30-دان استام ورتالىق اۋداندىق اۋرۋحانادا كۇردەلى جوندەۋ جانە رەكونسترۋكتسيالاۋ جۇمىستارى جۇرگىزىلەدى. بۇل شارالار «التىن ساعات» قاعيداتى بويىنشا جەرگىلىكتى جەرلەردە مەديتسينالىق كومەك الۋعا مۇمكىندىك بەرەدى.
كوكشەتاۋ قالاسىندا التاي كولگىنوۆ «Eurasia Group Kazakhstan» جشس بازاسىندا دۋالدى وقىتۋ باعدارلاماسىن جۇزەگە اسىرۋ بارىسىمەن تانىستى. اگروتەحنيكالىق كوللەدج ستۋدەنتتەرى ءوزارا ىنتىماقتاستىق جونىندەگى مەموراندۋم اياسىندا كاسىپورىندا كاسىبي تاجىريبەدەن ءوتىپ، ودان ءارى جۇمىسقا ورنالاسادى. اقمولا وبلىسى اكىمدىگىنىڭ اقپاراتى بويىنشا دۋالدى وقىتۋ نىسانى 28 كوللەدجدە قولدانىلادى، اتالعان تەحنولوگيا بويىنشا 4 مىڭنان استام ستۋدەنت ءبىلىم الۋدا.
«اۋىل اماناتى» باعدارلاماسىن جۇزەگە اسىرۋ اياسىندا التاي كولگىنوۆ ءسۇت ونىمدەرىن شىعاراتىن «گورمولزاۆود» جشس-دا بولىپ، جوبانىڭ العاشقى قاتىسۋشىلارىمەن كەزدەستى. باعدارلاما اياسىندا كاسىپورىن شيكىزاتتى جوباعا قاتىسۋشىلاردان ساتىپ الادى. اقمولا وبلىسىنىڭ اكىمى ەرمەك مارجىقپاەۆتىڭ ايتۋىنشا، 2023 جىلى باعدارلاماعا قاتىسۋشىلاردى نەسيەلەۋ ءۇشىن مەملەكەت تاراپىنان اقمولا وبلىسىنا 1,2 ملرد تەڭگە ءبولىندى، وسى قاراجات اياسىندا اۋىلدىق ەلدى مەكەندەردە جانە شاعىن قالالاردا جاڭا بيزنەس-جوبالاردى اشۋعا جانە قولدانىستاعى جوبالاردى كەڭەيتۋگە شامامەن 250 نەسيە بەرۋ جوسپارلانۋدا.
التاي كولگىنوۆ مەملەكەت باسشىسىنىڭ تاپسىرماسى بويىنشا اۋىل تۇرعىندارىنىڭ تابىسىن ارتتىرۋ جونىندەگى جوبا 2023 جىلدان باستاپ وڭىرلەردىڭ ەرەكشەلىكتەرى مەن الەۋمەتتىك-ەكونوميكالىق دامۋىن ەسكەرە وتىرىپ، بارشا ەل توڭىرەگىندە كەڭەيتىلەتىنىن اتاپ ءوتتى. وسى ماقساتتا رەسپۋبليكالىق بيۋدجەتتەن 50 ملرد تەڭگەدەن استام قارجى ءبولىندى.
سونداي-اق وبلىستا «جايلى مەكتەپ» ۇلتتىق جوباسىن جۇزەگە اسىرۋ بويىنشا جۇمىس جۇرگىزىلۋدە. اقمولا وبلىسىندا 2023-2025 جىلدارى 26 500 وقۋشىعا ارنالعان 20 مەكتەپ سالۋ كوزدەلگەن.
جۇمىس ساپارىنىڭ سوڭىندا سولتۇستىك قازاقستان، پاۆلودار، قوستاناي وبلىستارى اكىمدەرى ورىنباسارلارىنىڭ، دەنساۋلىق ساقتاۋ، ەڭبەك جانە الەۋمەتتىك قورعاۋ، وقۋ-اعارتۋ، اۋىل شارۋاشىلىعى، مادەنيەت جانە سپورت، ۇلتتىق ەكونوميكا ۆيتسە-مينيسترلەرىنىڭ جانە ت. ب. قاتىسۋىمەن كەڭەس ءوتتى، وندا الەۋمەتتىك مەملەكەتتىك باعدارلامالاردى ساپالى جۇزەگە اسىرۋ بويىنشا بىرقاتار تاپسىرمالار بەرىلدى.
بۇعان دەيىن ۆيتسە-پرەمەر التاي كولگىنوۆ جامبىل، اقتوبە، ماڭعىستاۋ وبلىستارىندا بولدى.
