مەملەكەت باسشىسى قاسىم-جومارت توقاەۆ پارلامەنت پالاتالارىنىڭ توراعالارىمەن جانە پرەمەر-مينيسترمەن پارلامەنت ءماجىلىسىن تاراتۋ جانە ءماسليحاتتاردىڭ وكىلەتتىگىن مەرزىمىنەن بۇرىن توقتاتۋ جونىندە كەڭەس وتكىزدى. بۇل تۋرالى اقوردانىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
قاسىم-جومارت توقاەۆ قازاقستان حالقى رەفەرەندۋمدا ساياسي وزگەرىستەرگە، سونىڭ ىشىندە پارلامەنتتى جانە ءماسليحاتتاردى جاساقتاۋ ءتارتىبىن جاڭارتۋعا قولداۋ بىلدىرگەنىن ايتتى.
– مەن قىركۇيەكتەگى جولداۋىمدا الدا تۇرعان سايلاۋ ناۋقاندارى تۋرالى ايتتىم. سوعان سايكەس وتكەن جىلدىڭ قاراشا ايىندا كەزەكتەن تىس پرەزيدەنت سايلاۋى ءوتتى. جۋىردا سەنات دەپۋتاتتارىنىڭ ءبىر بولىگى سايلاندى. ەندى ءماجىلىس پەن ءماسليحات سايلاۋىن وتكىزۋىمىز كەرەك، – دەدى پرەزيدەنت.
مەملەكەت باسشىسى كونستيتۋتسيانىڭ 63-ءشى جانە 86-شى باپتارىنا سايكەس وتكىزگەن كەڭەس بارىسىندا پارلامەنت سەناتىنىڭ توراعاسى ماۋلەن اشىمباەۆ، پارلامەنت ءماجىلىسىنىڭ توراعاسى ەرلان قوشانوۆ جانە پرەمەر-مينيستر ءاليحان سمايىلوۆ ءسوز سويلەدى.
كەزدەسۋ سوڭىندا پرەزيدەنت بارلىق ايتىلعان وي-تۇجىرىمداردى ەسكەرىپ، ناقتى شەشىم قابىلدايتىنىن مالىمدەدى.
"ادىرنا" ۇلتتىق پورتالى
