بۇگىن استانا قالاسىندا «اق جول» دەموكراتيالىق پارتياسى ۇيىمداستىرعان «ءار قازاق مەنىڭ - جالعىزىم» ءداستۇرلى فوتوبايقاۋىنىڭ قورىتىندىسى شىعارىلدى.
بيىلعى بايقاۋعا بارلىعى 100-گە جۋىق اۆتوردان 340-قا تارتا جۇمىس كەلىپ تۇسكەن. بارلىق جۇمىس كوميسسيا قاراۋىنا جىبەرىلدى. كوميسسيا قۇرامىندا ايگىلى فوتوجۋرناليستەر شۇكىرالى شاحاي، ەرلان وماروۆ، بەلگىلى جۋرناليست قاينار ولجاي سەكىلدى تانىمال تۇلعالار قىزىلىق جاسادى.
جەڭىمپازدار مەن جۇلدەگەرلەردى سالتاناتتى ماراپاتتاۋ ءراسىمىن العىسوزىمەن اشقان «اق جول» دەموكراتيالىق پارتياسىنىڭ توراعاسى ازات پەرۋاشەۆ بارلىق قاتىسۋشىلاردى قۇتتىقتاپ، بايقاۋدىڭ ءمان-جايى تۋرالى تولعامدى پىكىرىن ايتتى.
«ءار قازاق – مەنىڭ جالعىزىم» بايقاۋىنىڭ قورىتىندىسى وتكەن جىلى شىعۋى كەرەك ەدى. پرەزيدەنت سايلاۋى تۇسپا-تۇس كەلىپ، بۇگىنگى ءىس-شارامىزدى كەيىنگە شەگەرۋگە تۋرا كەلدى. مىنە، بۇگىن سونىڭ ءساتى كەلىپ تۇر. جالپى، پورترەتتىك، تاقىرىپتىق جانە وزگە دە جانرلار ارقىلى ەلىمىزدىڭ اسەم تابيعاتىن، قاراپايىم ەڭبەك ادامدارىنىڭ تۇرمىس-تىرشىلىگى مەن كەلبەتىن، قازاق تاريحىنىڭ ماڭىزدى وقيعالارىن، الاش ۇستانىمىن سۋرەت ارقىلى كورسەك دەگەن ماقساتپەن وسى بايقاۋدى ۇيىمداستىرىپ كەلەمىز. بايقاۋعا بارلىق ايماقتاردان كاسىبي دە، اۋەسقوي دا فوتوگرافتار قاتىستى. «اق جول» پارتياسى بۇل بايقاۋدىڭ قۇرىلتايشىسى بولسا، سول بايقاۋدىڭ جەڭىمپازدارى مەن جۇلدەگەرلەرىن انىقتاۋ جۇمىسى وسى سالانىڭ بەلگىلى مايتالماندارىنا جۇكتەلدى.
كۇن سايىن گازەت-جۋرنالداردا، اقپاراتتىق سايتتاردا، ءتۇرلى پابليكتەردەگى ماتىندەردە مىندەتتى تۇردە سۋرەتتەر بولۋ كەرەك. ونسىز وقيعانى ەلەستەتۋ مۇمكىن ەمەس. سوندىقتان فوتوگرافتاردىڭ ەڭبەكتەرى وتە زور. وسى تۇستا، ادىلقازى مۇشەلەرىنە، بايقاۋ قاتىسۋشىلارىنا دا العىسىمدى بىلدىرەمىن جانە بايقاۋ جەڭىمپازدارى مەن جۇلدەگەرلەرىن قۇتتىقتايمىن، - دەدى ازات پەرۋاشەۆ.
— بايقاۋعا ارقيلى فوتوسۋرەتتەر ءتۇستى. كوبىسى تاقىرىپتى تولىق اشا الماعان. سوندىقتان، ءبىز سۋرەتتەردى تاڭداۋ بارىسىندا ءبىراز قينالدىق، 3-4 ساعات تالقىلادىق. دەسەدە، كوميسسيا قۇرامى ءبىر بايلامعا كەلدىك. بۇگىنگى جەڭىس تۇعىرىنان كورىنگەن بايقاۋ قاتىسۋشىلارىن قۇتتىقتايمىن. الداعى ۋاقىتتا وسى قازاقتىڭ فوتوونەرىن دامىتۋعا ۇلەستەرىڭىزدى قوسا بەرىڭىزدەر.
سونىمەن قاتار، «ءار قازاق – مەنىڭ جالعىزىم» دەگەن بايقاۋدى جىل سايىن ۇيىمداستىرىپ، قولداپ وتىرعان ازات تۇرلىبەكۇلى وزىڭىزگە جانە «اق جول» پارتياسىنا ءوز اتىمنان، بارلىق فوتوگرافتار اتىنان العىس بىلدىرەمىن. جۇمىستارىڭىز العا قاراي باسا بەرسىن، وسىلاي فوتوگراف ماماندارىن قولداعاندارىڭىزعا راحمەت ايتامىن، – دەدى بەلگىلى فوتوگراف، فوتوبايقاۋدىڭ قازىلار القاسىنىڭ توراعاسى شۇكىرالى شاحاي
سالتاناتتى ماراپاتتاۋ راسىمىنە «اق جول» فراكتسياسىنىڭ دەپۋتاتتارى قاتىستى. جەڭىمپازدار مەن جۇلدەگەرلەر ەستەلىك ديپلومدارمەن جانە اقشالاي سىيلىقتارمەن ماراپاتتالدى.
«ءار قازاق مەنىڭ – جالعىزىم» ءداستۇرلى فوتوبايقاۋىنىڭ جەڭىمپازدارى مەن جۇلدەگەرلەرى:
كاسىبي فوتوگرافتار اراسىندا:
I ورىن (600 مىڭ تەڭگە) الحاروۆ وڭعاربەك (الماتى قالاسى)
II ورىن (400 مىڭ تەڭگە) ەردەنبەك ەربول (استانا قالاسى)
III ورىن (200 مىڭ تەڭگە) قىزايبەك سارسەنبەك (الماتى قالاسى)
اۋەسقوي فوتوگرافتار اراسىندا:
I ورىن (300 مىڭ تەڭگە) ابدىرازاق شىڭعىس (شىمكەنت قالاسى)
II ورىن (200 مىڭ تەڭگە) دوششانوۆ ءابىل (قوستاناي وبلىسى)
III ورىن (100 مىڭ تەڭگە) ابدىكارىموۆا داناگۇل (وسكەمەن قالاسى)
ارنايى جۇلدە:
«قازاق ەلى» نوميناتسياسىمەن (50 مىڭ تەڭگە) تولەۋباي ارداق (الماتى قالاسى)
«كاسىبىم-ءناسىبىم» نوميناتسياسىمەن (50 مىڭ تەڭگە) مۋتيگۋللين امانگەلدى (اتىراۋ وبلىسى)
«ۇزدىك پورترەت» نوميناتسياسىمەن (50 مىڭ تەڭگە) ءابدۋرايموۆا گاۋحار (تۇركىستان وبلىسى)
«باقىتتى بالداۋرەن» نوميناتسياسىمەن (50 مىڭ تەڭگە) ءامىروۆ مارات (استانا قالاسى)
