قر عىلىم جانە جوعارى ءبىلىم ءمينيسترى ساياسات نۇربەك اقش-قا جۇمىس ساپارىن Harvard University وكىلدەرىمەن كەزدەسۋمەن اياقتادى. ءىس-شارا بارىسىندا گارۆارد ستۋدەنتتەرىنىڭ قازاقستاندا تاعىلىمدامادان ءوتۋى تۋرالى ۋاعدالاستىققا قول جەتكىزىلدى. بۇل تۋرالى عىلىم جانە جوعارى ءبىلىم مينيسترلىگى مالىمدەدى، دەپ حابارلايدى «ادىرنا» ءتىلشىسى.
اقش-تاعى سوڭعى جۇمىس كۇنى مينيستر ساياسات نۇربەك Harvard Innovation Lab, The New England Commission of Higher Education, Davis Center fo Russia and Eurasia studies Harvard Kennedy School باسشىلىعىمەن، دۋگلاس ديللون اتىنداعى مەملەكەتتىك باسقارۋ پروفەسسورى گرەم الليسون جانە گارۆارد كەننەدي مەكتەبىنىڭ حالىقارالىق قارجى جانە دامۋ جونىندەگى Sumitomo - FASID پروفەسسورى، حالىقارالىق دامۋ ورتالىعىنىڭ ديرەكتورى ازيم كحۆادجامەن كەزدەسۋ وتكىزدى. ءىس-شارا بارىسىندا ۆەدومستۆو باسشىسى قازاقستانداعى جوعارى ءبىلىم مەن عىلىم جۇيەسى، مينيسترلىك الدىندا تۇرعان پەرسپەكتيۆالار مەن باسىمدىقتار تۋرالى ايتىپ بەردى. سونداي-اق، قر جوعارى ءبىلىمىن دامىتۋ ماقساتىندا جەتەكشى الەمدىك جوعارى وقۋ ورنىمەن سەرىكتەستىك ۇسىنىلدى.
ءوز كەزەگىندە پروفەسسور ازيم كحۆادجا ءمينيستردى ءوزى باسقاراتىن ورتالىقتىڭ قىزمەتىمەن تانىستىردى. ول ءوزىنىڭ قىزىعۋشىلىعىن اتاپ ءوتىپ، ىنتىماقتاستىقتى قازاقستانداعى گارۆارد ستۋدەنتتەرىنىڭ تاعىلىمداماسىنان باستاۋدى ۇسىندى. مينيستر ساياسات نۇربەك بۇل باستامانى قولدادى.
سونىمەن قاتار، تاراپتار جوعارى وقۋ ورىندارىنىڭ ءبىلىم الۋشىلارى مەن عالىمدارمەن الماسۋ بويىنشا مۇمكىن بولاتىن جوبالاردى تالقىلادى.
قازاقستاندىق جوعارى وقۋ ورىندارى مەن گارۆارد ۋنيۆەرسيتەتى اراسىنداعى ىنتىماقتاستىقتى ودان ءارى تالقىلاۋ ءۇشىن ساياسات نۇربەك پروفەسسور ازيم كحۆادجانى قازاقستانعا شاقىردى، شاقىرۋ وڭ قابىلداندى.
رەسمي كەزدەسۋلەردەن كەيىن مينيستر Harvard University جانە MIT-دە وقيتىن قازاقستاندىقتارمەن كەزدەستى. ستۋدەنتتەر شەتەلدە وقۋدان العان اسەرلەرىمەن ءبولىستى. ءوز كەزەگىندە مينيستر ستۋدەنتتەرگە جوعارى ءبىلىم جانە عىلىم سالاسىندا جۇرگىزىلىپ جاتقان رەفورمالار تۋرالى ايتىپ، جاس زەرتتەۋشىلەر مەن عالىمداردى قولداۋ بويىنشا مەملەكەت قولعا الىپ وتىرعان شارالاردى ەرەكشە اتاپ ءوتتى.
