QR Ǵylym jáne joǵary bilim mınıstri Saıasat Nurbek AQSh-qa jumys saparyn Harvard University ókilderimen kezdesýmen aıaqtady. Is-shara barysynda Garvard stýdentteriniń Qazaqstanda taǵylymdamadan ótýi týraly ýaǵdalastyqqa qol jetkizildi. Bul týraly Ǵylym jáne joǵary bilim mınıstrligi málimdedi, dep habarlaıdy «Adyrna» tilshisi.
AQSh-taǵy sońǵy jumys kúni mınıstr Saıasat Nurbek Harvard Innovation Lab, The New England Commission of Higher Education, Davis Center fo Russia and Eurasia studies Harvard Kennedy School basshylyǵymen, Dýglas Dıllon atyndaǵy memlekettik basqarý professory Grem Allıson jáne Garvard Kennedı mektebiniń halyqaralyq qarjy jáne damý jónindegi Sumitomo - FASID professory, Halyqaralyq damý ortalyǵynyń dırektory Azım Khvadjamen kezdesý ótkizdi. Is-shara barysynda vedomstvo basshysy Qazaqstandaǵy joǵary bilim men ǵylym júıesi, mınıstrlik aldynda turǵan perspektıvalar men basymdyqtar týraly aıtyp berdi. Sondaı-aq, QR joǵary bilimin damytý maqsatynda jetekshi álemdik joǵary oqý ornymen seriktestik usynyldy.
Óz kezeginde professor Azım Khvadja mınıstrdi ózi basqaratyn ortalyqtyń qyzmetimen tanystyrdy. Ol óziniń qyzyǵýshylyǵyn atap ótip, yntymaqtastyqty Qazaqstandaǵy Garvard stýdentteriniń taǵylymdamasynan bastaýdy usyndy. Mınıstr Saıasat Nurbek bul bastamany qoldady.
Sonymen qatar, taraptar joǵary oqý oryndarynyń bilim alýshylary men ǵalymdarmen almasý boıynsha múmkin bolatyn jobalardy talqylady.
Qazaqstandyq joǵary oqý oryndary men Garvard ýnıversıteti arasyndaǵy yntymaqtastyqty odan ári talqylaý úshin Saıasat Nurbek professor Azım Khvadjany Qazaqstanǵa shaqyrdy, shaqyrý oń qabyldandy.
Resmı kezdesýlerden keıin mınıstr Harvard University jáne MIT-de oqıtyn qazaqstandyqtarmen kezdesti. Stýdentter shetelde oqýdan alǵan áserlerimen bólisti. Óz kezeginde mınıstr stýdentterge joǵary bilim jáne ǵylym salasynda júrgizilip jatqan reformalar týraly aıtyp, jas zertteýshiler men ǵalymdardy qoldaý boıynsha memleket qolǵa alyp otyrǵan sharalardy erekshe atap ótti.
