قاراعاندى وبلىسىندا "قورىقشىلارعا شابۋىل جاسادى" دەگەن كۇدىكتى ءۇش ادام ۇستالدى. بۇل تۋرالى ىشكى ىستەر مينيسترلىگىنىڭ ء(ىىم) ءباسپاسوز حاتشىسى الماس سادۋباەۆ حابارلادى.
سادۋباەۆتىڭ مالىمدەۋىنشە، قاراعاندى وبلىسىنىڭ نۇرا اۋدانىندا "وحوتزووپروم" رەسپۋبليكالىق مەكەمەسىنىڭ ينسپەكتورى ەرلان نۇرعاليەۆتىڭ ولىمىنە كۇدىكتى دەپ تانىلعاندار 21 قاڭتار كۇنى قىزىلوردادا "ارنايى وپەراتسيا بارىسىندا جەكە ۇيدە ۇستالعان". قازىر كۇدىكتىلەر ۋاقىتشا ۇستاۋ اباقتىسىنا قامالىپ، تەرگەلىپ جاتىر.
ىشكى ىستەر مينيسترلىگى 18 قاڭتاردا "قاراعاندى وبلىسىندا قورىقشىلارعا شابۋىل جاسادى" دەگەن كۇدىكتىلەردىڭ سۋرەتى مەن اتى-جوندەرىن جاريالاعان. ولار - ب.م. احمەتوۆ، ن.م. شۋكيلديكوۆ، ك.ۆ. اكشانوۆ.
17 قاڭتاردا استانادا جۋرناليستەر سۇراقتارىنا جاۋاپ بەرگەن ىشكى ىستەر ءمينيسترى قالمۇحانبەت قاسىموۆ پوليتسيا كۇدىكتىلەردىڭ انىقتالعانىن، ولاردىڭ قىزىلوردا وبلىسىنىڭ تۋمالارى ەكەنىن ايتقان.
P.S. بىراق، الەۋمەتتىك جەلىدەگى پىكىرلەردىڭ كوپشىلىگى ۇستالعانداردىڭ قىلمىسقا قاتىسى بارىنا سەنبەيتىنىن ايتۋدا. ناعىز قىلمىسكەرلەر قۇتىلىپ كەتىپ، ونىڭ ورنىنا جوعارى لاۋازىمدى "اڭشىلاردىڭ" شوپىرلارى مەن اتقوسشىلارى "كىنالارىن" مويىنداپ، قىلمىستى موينىنا الۋى مۇمكىن ەكەنىن جازۋدا.
"ادىرنا" ۇلتتىق پورتالى
