ەلورداداعى الاش تاسجولىندا ورنالاسقان كوپىر جارىلدى. بۇل تۋرالى الەۋمەتتىك جەلىدە ۆيدەو تارادى، دەپ حابارلايدى “ادىرنا” ۇلتتىق پورتالى.
بولعان جايتقا قاتىستى استانا قالالىق كولىك جانە جول-كولىك ينفراقۇرىلىمىن دامىتۋ باسقارماسى تۇسىنىك بەردى.
"الاش تاسجولىنداعى "بۇكىر كوپىر" بۇعان دەيىن اپاتتى دەپ تانىلعان ەدى. وسىعان بايلانىستى جول وتپەسىنىڭ وڭ جاق بولىگى جوندەلىپ، قوزعالىس 2022 جىلى جازدا اشىلدى. كولدەنەڭ اسفالتبەتون جابىنىنىڭ ءىشىنارا دەفورماتسياسى جول وتپەسىنىڭ جوندەلمەگەن تۇسى – سول جاق بولىگىندە ورىن الدى. وسى ورايدا جول بەلگىلەرى قويىلىپ، ۋچاسكەنى قالپىنا كەلتىرۋ جۇمىسى جۇرگىزىلىپ جاتىر", - دەلىنگەن تاراتىلعان اقپاراتتا.
سونداي-اق، حابارلامادا ايتىلعانداي جول-قۇرىلىس جۇمىستارى ماۋسىمى باستالىسىمەن قوزعالىستى قالپىنا كەلتىرۋ ءۇشىن جول وتپەسىنىڭ سول جاق بولىگىن جابۋ جوسپارلانعان.
"كوپىردىڭ زاقىمدانۋىن ەسكەرە وتىرىپ، جول وتپەسىنىڭ سول جاعىمەن اۆتوكولىك قوزعالىسى ۋاقىتشا جابىلادى. دەگەنمەن كولىك قۇرالدارى ءۇشىن كوپىردىڭ ەكى جاق بولىگىمەن دە قوزعالىس قامتاماسىز ەتىلەدى", - دەيدى باسقارمادان.
ودان بولەك، "Ikomek" ورتالىعىنىڭ الەۋمەتتىك جەلىدەگى جاۋابىندا جول توسەمىن قالپىنا كەلتىرۋ جۇمىسى 15 قاڭتارعا دەيىن جۇرگىزىلەتىنى ايتىلعان.
ەسكە سالايىق، 2020 جىلى اتالعان كوپىر وپىرىلىپ قۇلاعان ەدى.
