بلوگەر توقبەرگەن ابيەۆ 50 ميلليون تەڭگە بوپسالادى دەگەن كۇدىكپەن قاماۋعا الىندى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى حابارلادى، دەپ جازادى "ادىرنا" ۇلتتىق پورتالى.
"سىبايلاس جەمقورلىققا قارسى قىزمەت توقبەرگەن ابيەۆتىڭ بۇقارالىق اقپارات قۇرالدارىندا زياندى مالىمەتتەردى تاراتۋ جانە ءوزىنىڭ Youtube-ارناسىندا شىندىققا سايكەس كەلمەيتىن بەينەجازبالاردى جويۋ ءۇشىن كاسىپكەردەن اسا ءىرى مولشەردە اقشا بوپسالادى دەگەن كۇدىكپەن قىلمىستىق ارەكەتىنىڭ جولىن كەستى. وتكەن جىلدىڭ 14 جەلتوقساندا ابيەۆ 50 ميلليون تەڭگەمەن ۇستالىپ، سوتتىڭ سانكتسياسىنان 2 اي مەرزىمگە قاماۋعا الىندى",- دەلىنگەن حابارلامادا.
انتيكوردىڭ حابارلاۋىنشا، بۇدان باسقا ابيەۆ مەملەكەتتىك ورگاندار قىزمەتكەرلەرى مەن ازاماتتاردى اداستىرۋ ماقساتىندا «سىبايلاس جەمقورلىققا قارسى كۇرەس دەپارتامەنتى» جشس جەكە زاڭدى تۇلعاسىن تىركەگەنى انىقتالدى.
"اتالعان ۇيىمنىڭ باسشىسى بولىپ كورىنىپ، سول ارقىلى بيلىك وكىلىنىڭ بەينەسىن جاساي وتىرىپ، ابيەۆ كاسىپكەرلەر مەن مەملەكەتتىك ورگانداردىڭ لاۋازىمدى ادامدارىنان ءوزىنىڭ جەكە مۇددەسى ءۇشىن ءىس-ارەكەتتەر جاساۋدى، سونداي-اق زاڭدا بەلگىلەنگەن ءتارتىپتى بۇزا وتىرىپ اقپارات پەن ماتەريالدار بەرۋدى تالاپ ەتتى. ابيەۆ تەك وزىنە-ءوزى قىزمەت ەتۋ سەبەپتەرىن كوزدەي وتىرىپ، اقشالاي سىياقىلار ءۇشىن جەكە تۇلعالارعا ءوز ۇيىمى قىزمەتكەرىنىڭ قىزمەتتىك كۋالىكتەرىن بەرىپ، ولاردى بيلىك وكىلىنىڭ مارتەبەسى تۋرالى جاڭىلىستىردى. الايدا، ابيەۆتىڭ قىزمەتى قۇقىق قورعاۋ ورگاندارىنىڭ جۇمىسىمەن ەشقانداي بايلانىستى ەمەس. ابيەۆتىڭ باسقا دا وسىعان ۇقساس قىلمىستارعا قاتىسى تۋرالى اقپارات تەكسەرىلەدى",- دەلىنگەن حابارلامادا.
"ادىرنا" ۇلتتىق پورتالى
