Bloger Toqbergen Ábıev 50 mıllıon teńge bopsalady degen kúdikpen qamaýǵa alyndy. Bul týraly Sybaılas jemqorlyqqa qarsy is-qımyl agenttigi habarlady, dep jazady "Adyrna" ulttyq portaly.
"Sybaılas jemqorlyqqa qarsy qyzmet Toqbergen Ábıevtiń buqaralyq aqparat quraldarynda zııandy málimetterdi taratý jáne óziniń Youtube-arnasynda shyndyqqa sáıkes kelmeıtin beınejazbalardy joıý úshin kásipkerden asa iri mólsherde aqsha bopsalady degen kúdikpen qylmystyq áreketiniń jolyn kesti. Ótken jyldyń 14 jeltoqsanda Ábıev 50 mıllıon teńgemen ustalyp, sottyń sankııasynan 2 aı merzimge qamaýǵa alyndy",- delingen habarlamada.
Antıkordyń habarlaýynsha, budan basqa Ábıev memlekettik organdar qyzmetkerleri men azamattardy adastyrý maqsatynda «Sybaılas jemqorlyqqa qarsy kúres Departamenti» JShS jeke zańdy tulǵasyn tirkegeni anyqtaldy.
"Atalǵan uıymnyń basshysy bolyp kórinip, sol arqyly bılik ókiliniń beınesin jasaı otyryp, Ábıev kásipkerler men memlekettik organdardyń laýazymdy adamdarynan óziniń jeke múddesi úshin is-áreketter jasaýdy, sondaı-aq zańda belgilengen tártipti buza otyryp aqparat pen materıaldar berýdi talap etti. Abıev tek ózine-ózi qyzmet etý sebepterin kózdeı otyryp, aqshalaı syıaqylar úshin jeke tulǵalarǵa óz uıymy qyzmetkeriniń qyzmettik kýálikterin berip, olardy bılik ókiliniń mártebesi týraly jańylystyrdy. Alaıda, Ábıevtiń qyzmeti quqyq qorǵaý organdarynyń jumysymen eshqandaı baılanysty emes. Ábıevtiń basqa da osyǵan uqsas qylmystarǵa qatysy týraly aqparat tekseriledi",- delingen habarlamada.
"Adyrna" ulttyq portaly
