بەلگىلى يسلامتانۋشى، عالىم، قالامگەر قايرات جولدىبايۇلى "قاڭتار وقيعاسى" مەن قازاق ەلىندەگى الەۋمەتتىك-ساياسي كەلەڭسىزدىكتەرگە قاتىستى شىندىقتى اشىپ ايتپاعان بيلىكتىڭ ارەكەتىن سىنعا الدى, دەپ جازادى "ادىرنا" ۇلتتىق پورتالى اۆتوردىڭ فەيسبۋكتاعى جازباسىنا سىلتەمە جاساپ.
قوعامعا بەلگىلى يسلامتانۋشى، عالىم قاڭتار وقيعاسىنا قاتىستى ايتىلۋى، اشىلۋى ءتيىس شىندىقتى سانامالاپ، بيلىككە تالاپ قويدى.
- قاڭتار وقيعاسىنا مىنە ءبىر جىل تولدى. بىراق ءالى ءتۇيىنى تولىق تارقاتىلىپ، شىندىق ايتىلماي وتىر. سۇراق كوپ، جاۋاپ جوق.بيلىك حالىق الدىندا مىنا سۇراقتارعا اشىق ءارى شىنايى جاۋاپ بەرۋگە ءتيىس:1. قاڭتار وقيعاسىندا بيلىكتى كۇشپەن تارتىپ الۋ بويىنشا تۇتقىندالىپ، تەرگەۋدە وتىرعان ءماسىموۆتىڭ ارعى جاعىندا كىمدەر تۇر؟ تاپسىرىس بەرۋشى كىم؟ بيلىك ۋاقىت سوزىپ بارىپ، ماسەلەنى ماسىموۆپەن عانا تۇيىندەسە، بۇل زامانبەككە ءوز-وزىنە ءۇش رەت وق اتقىزعاننان دا بەتەر وتىرىك بولادى.2. 238 ادام قازا تاپقان قاسىرەتتى قاڭتار وقيعاسىنىڭ تەرگەۋى نەلىكتەن جابىق وتۋدە؟ تەرگەۋدە وتىرعان ءماسىموۆ پەن ونىڭ سىبايلاستارى نەگىزگى تاپسىرىس بەرۋشىنى جاريا ەتىپ جىبەرە مە دەگەن ساقتىق پا؟3. حالىقتى ارانداتتى، قارۋ قولداندى دەلىنگەن بانديتتەر كىمدەر؟ نەشەۋى تۇتقىندالىپ، قانشاۋى وققا ۇشتى؟ قاشىپ كەتكەندەر شە؟4. ابايسىزدا وققا ۇشتى دەلىنگەن بەيبىت ازاماتتاردىڭ وتباسىنا قۇن تولەندى مە؟ ولاردىڭ وتباسىنان رەسمي تۇردە كەشىرىم سۇرالا ما؟5. التىنشى قاڭتار كۇنى ء"بىز بەيبىت حالىقپىز، ءبىز قاراپايىم حالىقپىز، ءبىز تەرروريست ەمەسپىز” دەگەن جازۋى بار ۇلكەن پلاكاتپەن الاڭدا تۇرعان بەيبىت حالىققا ەشبىر ەسكەرتۋ جاسالماستان، تىلدەسىپ سويلەسپەستەن اسكەريلەردىڭ وق اتقاندىعى جايلى كۋاگەرلەردىڭ سوزدەرى، تۇسىرىلگەن بەينە ۇزىندىلەرى بويىنشا تەرگەۋ جۇمىسى جۇرگىزىلدى مە؟ انىق-قانىعى ايعاقتارمەن راستالدى ما؟ الاڭدا بىردە-ءبىر بەينەباقىلاۋدىڭ بولماۋى مۇمكىن ەمەس قوي! كۋاگەرلەردىڭ ايتقانىنداي اسكەريلەردىڭ بەيبىت حالىققا وق اتقاندارى راس بولسا، ول جەردە جازسىقسىز قانشا ادام مەرت بولدى؟ وق اتقان كىمدەر؟ بۇعان كىم جاۋاپتى؟6. بۇكىل ەلدىڭ جارتى بايلىعىن 162 ادام يەمدەنىپ وتىرعانىن پرەزيدەنتتىڭ ءوزى اشىق ايتقان بولاتىن. 162 ادام، ولار كىمدەر؟ 30 جىل بويى بايلىققا ادىلەتسىز جولمەن يەلىك ەتكەن وليگارحتار ءالى كۇنگە دەيىن نەلىكتەن جاۋاپقا تارتىلمايدى؟ - دەپ جازدى عالىم.
سونىمەن قاتار، قايرات جولدىبايۇلى "قاڭتار قىرعىنىنىڭ" تاريحي ماڭىزى بار ەكەندىگىن ەسكە سالدى. ادىلەتتى قازاقستاندى قۇرۋدىڭ قاراپايىم جولىن نۇسقادى.
- وسى سەكىلدى قاڭتار كوتەرىلىسىنە جانە وتىز جىلدىق توناۋعا قاتىستى سۇراقتارعا اشىق ءارى شىنايى جاۋاپ بەرىلمەيىنشە حالىق پەن بيلىك اراسىندا ەشقاشان سەنىم ورنامايدى. ال سەنىم جوق جەردە دامۋ دا، تۇراقتىلىق تا بولمايدى. قانشا ۋاقىت وتسە دە، بيلىك وسى سۇراقتارمەن ىلعي بەتپە-بەت كەلەتىن بولادى. تاريح الدىندا، ۇرپاق الدىندا، اقىرەتتە مىندەتتى تۇردە سۇراۋى بولادى. ادىلەتتى قازاقستاننىڭ ىرگەتاسى قاڭتار كوتەرىلىسىنىڭ ءادىل تەرگەلۋىندە جاتىر - دەپ تۇيىندەدى اۆتور.
"ادىرنا" ۇلتتىق پورتالى
