ماسكەۋدە تمد-عا مۇشە ەلدەر جازۋشىلارىنىڭ ەگەمەندىك جىلدارىندا جازعان شىعارمالارىن ارقاۋ ەتكەن ءىرى انتولوگيا جارىق كوردى. انتولوگياعا ەنگەن قازاق جازۋشىلارىنىڭ تۋىندىلارى كەلەشەكتە 11 تىلگە اۋدارىلىپ، جارتى الەمنىڭ وقىرماندارىنا جول تارتپاق. بۇل جايلى "ادىرنا" ۇلتتىق پورتالى حابارلادى.
يگى باستاما جايلى پروزاشى نۇرجان قۋانتايۇلى حابارلادى:
- ماسكەۋدەن ورىس تىلىندە "تمد مەملەكەتتەرىنىڭ قازىرگى ادەبيەتى" سەرياسىمەن "پروزا" جانرى بويىنشا 1200 بەتتىك انتولوگيا جارىق كورىپتى. وعان بالتىق جاعالاۋى ەلدەرىنەن باسقا 11 مەملەكەت جازۋشىلارىنىڭ كوركەم شىعارمالارى (اڭگىمە، نوۆەللا) ەنگىزىلىپتى. انتولوگيانىڭ "زاماناۋي قازاق ادەبيەتى. پروزا" بولىمىنە ءبىزدىڭ دە "بالكون", "باتىڭكە", "ۇرەيلى ءۇش كۇن" دەگەن اڭگىمەلەرىمىز قوسىلىپتى. تاۋەلسىزدىك جىلدارىنىڭ باسىنداعى ادەبيەت تاڭدالىپ الىنىپتى. تاياۋدا پوەزيا مەن بالالار ادەبيەتى دە ءدال وسىنداي كىتاپ بولىپ باسىلىپ شىعادى دەيدى. سودان كەيىن وسى ءۇش تومدىق انتولوگيا ون ءبىر ەلدە اۋدارىلىپ جارىق كورمەك. بۇل يگىلىكتى شارۋانى وگي (وبەدينەننوە گۋمانيتارنوە يزداتەلستۆو) مەن رەسەي جازۋشىلار وداعى جانە ون ءبىر مەملەكەتتىڭ جازۋشىلار وداعى بىرلەسىپ اتقارىپ جاتىر ەكەن. بار شىعىندى ماسكەۋلىكتەر وزدەرى كوتەرىپ العان كورىنەدى. قازاق ادەبيەتى تاراپىنان وسى جوباعا اتسالىسقان تالانتتى اقىن ەرجان الاشتۋعان باۋىرىما العىس ايتامىن. جوبا جالعاسىن تابا بەرسىن! - دەپ جازدى قالامگەر.
"ادىرنا" ۇلتتىق پورتالى
