Belgili ıslamtanýshy, ǵalym, qalamger Qaırat Joldybaıuly "Qańtar oqıǵasy" men Qazaq elindegi áleýmettik-saıası keleńsizdikterge qatysty shyndyqty ashyp aıtpaǵan bıliktiń áreketin synǵa aldy, dep jazady "Adyrna" ulttyq portaly avtordyń feısbýktaǵy jazbasyna silteme jasap.
Qoǵamǵa belgili ıslamtanýshy, ǵalym Qańtar oqıǵasyna qatysty aıtylýy, ashylýy tıis shyndyqty sanamalap, bılikke talap qoıdy.
- Qańtar oqıǵasyna mine bir jyl toldy. Biraq áli túıini tolyq tarqatylyp, shyndyq aıtylmaı otyr. Suraq kóp, jaýap joq.Bılik halyq aldynda myna suraqtarǵa ashyq ári shynaıy jaýap berýge tıis:1. Qańtar oqıǵasynda bılikti kúshpen tartyp alý boıynsha tutqyndalyp, tergeýde otyrǵan Másimovtyń arǵy jaǵynda kimder tur? Tapsyrys berýshi kim? Bılik ýaqyt sozyp baryp, máseleni Másimovpen ǵana túıindese, bul Zamanbekke óz-ózine úsh ret oq atqyzǵannan da beter ótirik bolady.2. 238 adam qaza tapqan qasiretti qańtar oqıǵasynyń tergeýi nelikten jabyq ótýde? Tergeýde otyrǵan Másimov pen onyń sybaılastary negizgi tapsyrys berýshini jarııa etip jibere me degen saqtyq pa?3. Halyqty arandatty, qarý qoldandy delingen bandıtter kimder? Nesheýi tutqyndalyp, qanshaýy oqqa ushty? Qashyp ketkender she?4. Abaısyzda oqqa ushty delingen beıbit azamattardyń otbasyna qun tólendi me? Olardyń otbasynan resmı túrde keshirim surala ma?5. Altynshy qańtar kúni "biz beıbit halyqpyz, biz qarapaıym halyqpyz, biz terrorıst emespiz” degen jazýy bar úlken plakatpen alańda turǵan beıbit halyqqa eshbir eskertý jasalmastan, tildesip sóılespesten áskerılerdiń oq atqandyǵy jaıly kýágerlerdiń sózderi, túsirilgen beıne úzindileri boıynsha tergeý jumysy júrgizildi me? Anyq-qanyǵy aıǵaqtarmen rastaldy ma? Alańda birde-bir beınebaqylaýdyń bolmaýy múmkin emes qoı! Kýágerlerdiń aıtqanyndaı áskerılerdiń beıbit halyqqa oq atqandary ras bolsa, ol jerde jazsyqsyz qansha adam mert boldy? Oq atqan kimder? Buǵan kim jaýapty?6. Búkil eldiń jarty baılyǵyn 162 adam ıemdenip otyrǵanyn prezıdenttiń ózi ashyq aıtqan bolatyn. 162 adam, olar kimder? 30 jyl boıy baılyqqa ádiletsiz jolmen ıelik etken olıgarhtar áli kúnge deıin nelikten jaýapqa tartylmaıdy? - dep jazdy ǵalym.
Sonymen qatar, Qaırat Joldybaıuly "Qańtar qyrǵynynyń" tarıhı mańyzy bar ekendigin eske saldy. Ádiletti Qazaqstandy qurýdyń qarapaıym jolyn nusqady.
- Osy sekildi qańtar kóterilisine jáne otyz jyldyq tonaýǵa qatysty suraqtarǵa ashyq ári shynaıy jaýap berilmeıinshe halyq pen bılik arasynda eshqashan senim ornamaıdy. Al senim joq jerde damý da, turaqtylyq ta bolmaıdy. Qansha ýaqyt ótse de, bılik osy suraqtarmen ylǵı betpe-bet keletin bolady. Tarıh aldynda, urpaq aldynda, aqyrette mindetti túrde suraýy bolady. Ádiletti Qazaqstannyń irgetasy qańtar kóterilisiniń ádil tergelýinde jatyr - dep túıindedi avtor.
"Adyrna" ulttyq portaly
