ءامىرجان قوسانوۆ: جاستاردى قولداۋ 362 كۇنمەن شەكتەلمەۋى كەرەك
قازاقستان پرەزيدەنتى نۇرسۇلتان نازارباەۆ بيىلعى جىلدى «جاستار جىلى» دەپ جاريالادى، بىلەسىزدەر.
ول ءۇشىن ارنايى قاۋلى شىعاردى. قاۋلىدا: «2019 جىل جاستار جىلى دەپ جاريالانسىن. قر ۇكىمەتى جاستار جىلىن وتكىزۋ بويىنشا قاجەتتى شارالار قابىلداسىن. وسى جارلىقتىڭ ورىندالۋىن باقىلاۋ قر پرەزيدەنت اكىمشىلىگىنە جۇكتەلسىن. وسى جارلىق قول قويىلعان كۇنىنەن باستاپ قولدانىسقا ەنگىزىلسىن» دەپ جازىلعان.
سونىمەن، پرەزيدەنت پارمەن بەرىپ 2019 جىل جاستار جىلى بولىپ بەكىتىلدى. جارلىق شىقتى. ەندى شە؟ ەندىگى مىندەت ۇكىمەتتە. باقىتجان ءابدىرۇلى باستاعان ۇكىمەت قايتپەك؟ قانداي جوبالاردى جۇزەگە اسىرماق؟ ونسىز دا كسرو-لىق گەرونتوكراتيالىق جۇيەدەن شىققان بيلىك بۇگىنگى جاستاردى اگەتاتسيالىق ناۋقاننىڭ ايعايشىلارى رەتىندە عانا تانىسا كەرەك. ايتپەگەندە، بيلىكتىك باسقارۋ ورگاندارىندا باس بولىپ شىققان بىرەۋدى بىلەسىز بە؟ ولاي بولماسا، قازاقستاننىڭ نەگىزگى زاڭ شىعارۋشى ورگانى سانالاتىن پارلامەنتتە (قوس پالاتادا دا) ىڭعاي زەينەتكەرلەر وتىرعانى قالاي؟ تاۋەلسىز قازاقستاننىڭ جاستارى نەگە زاڭ شىعارۋ ىسىنە ارالاسپايدى؟
زاڭ شىعارۋ ءىسى دەمەكشى، ءدال وسى ماسەلەنىڭ ءبىر شەتىن وتكەندە سەنات سپيكەرى قاسىم-جومارت كەمەلۇلى توقاەۆ شىعاردى.
ق.توقاەۆ سەناتتا وتەتىن ءىس-شارالارعا جاستاردى قاتىستىرۋدى ۇسىندى
وتكەندە پارلامەنتتە سەنات بيۋروسىنىڭ وتىرىسى ءوتتى. توراعا قاسىم-جومارت توقاەۆ ءسوز سويلەپ، پرەزيدەنت جولداۋدا ايتقان الەۋمەتتىك سالا مەن جاستار جىلىن وتكىزۋگە بايلانىستى مىندەتتەگەن تاپسىرمالاردى جۇزەگە اسىرۋ بويىنشا دەپۋتاتتار كورپۋسىنىڭ الداعى جوسپارىن بەلگىلەدى.
جاستار جىلىنا بايلانىستى بىرقاتار ۇسىنىستار ايتتى. ونىڭ ايتۋىنشا، ەلىمىزدەگى بەلسەندى ءارى بىلىكتى جاستاردىڭ وكىلدەرىن مەملەكەت مۇددەسىن ىلگەرىلەتۋ ىسىنە تارتۋ ماقساتىندا سەناتورلاردىڭ بەلسەندى جۇمىس ىستەۋى قاجەت.
پارلامەنت جوعارعى پالاتاسىنىڭ باسشىسى سەناتتا وتەتىن ءىس-شارالارعا، ونىڭ ىشىندە جالپى وتىرىستار مەن كوميتەتتەردىڭ استانالىق جانە ايماقتىق جوعارى وقۋ ورىندارىنىڭ ستۋدەنتتەرىن، كاسىپورىنداردىڭ جاس جۇمىسشىلارى مەن كومپانيالار قىزمەتكەرلەرىنىڭ قاتىسۋىن ۇيىمداستىرۋدى، قوعامدىق ۇيىمداردىڭ، ونىڭ ىشىندە «جاس وتان» وكىلدەرىنىڭ قاتىسۋىمەن مەملەكەتتىڭ جاستار ساياساتى ماسەلەلەرى بويىنشا ارنايى شارالار وتكىزۋدى ۇسىندى.
وسى رەتتە ءبىز بەلگىلى ساياساتكەر، ءوزى دە 1993-1994 جىلدارى قازاقستان رەسپۋبليكاسى جاستار ءىسى، تۋريزم جانە سپورت ءمينيسترىنىڭ ورىنباسارى بولعان، بۇگىنگى "جاڭا قازاقستان" قوزعالىسىنىڭ مۇشەسى ءامىرجان قوسانوۆ مىرزانىڭ پىكىرىن سۇراپ بىلگەن ەدىك.
جاستاردى قولداۋ 362 كۇنمەن شەكتەلىپ قويماي، ودان كەيىن دە ءوز جالعاسىن تابۋى ءتيىس!
ءامىرجان قوسانوۆ، ساياساتكەر:
-«جاستار جىلىن» جاريالاۋ دۇرىس قادام دەپ سانايمىن. بىراق، وكىنىشكە وراي، بىزدەگى كوپ «ارنايى جىلدار» جالپىلاما باياندامالار مەن شىعىنى كوپ، كىرىسى از، تۇككە تۇرمايتىن فورۋمدارمەن عانا شەكتەلىپ جاتادى.
مەنىڭشە، ونداي توزىعى جەتكەن داستۇردەن ءۇزىلدى-كەسىلدى باس تارتىپ، جاستار جىلىن وسكەلەڭ ۇرپاقتىڭ كۇندەلىكتى مۇڭ-مۇقتاجى مەن زاماناۋي سۇرانىس-تالاپتارىنا مەيلىنشە سايكەس ناقتى شەشىمدەرمەن راسىمدەۋ كەرەك دەپ ويلايمىن! جانە ول باستامالار مەن جاڭالىقتار جاستاردىڭ الەۋمەتتىك-ەكونوميكالىق، رۋحاني، قوعامدىق-ساياسي مۇددەلەرىمەن تابيعي تۇردە ۇشتاسىپ جاتسا، قۇبا قۇپ بولار ەدى.
وسى جىلى جاستار كاسىپورىندارىن نەگە ءۇش جىلعا سالىقتان بوساتپاسقا؟ بۇل قادام، اسىرەسە، اۋىلداعى ەكى قولىنا ءبىر كۇرەك تابا الماي وتىرعان جاستارعا كەرەك! قانشاما جاڭا بيزنەسمەندەر پايدا بولار ەدى؟ ءبارى اياققا تۇرىپ كەتپەسە دە، كاسىپكەرلىكتىڭ دامۋىنا بەلگىلى ءبىر دارەجەدە سەرپىن بەرىلەر ەدى عوي!
وسى جىلى ۇكىمەت جاستارعا ارنالعان قولجەتىمدى تۇرعىن ءۇي باعدارلاماسىنا قوسىمشا قوماقتى قارجى قاراستىرىپ، ناقتى باعدارلاما تۇزسە.
ستۋدەنتتەر جاستاردىڭ پروبلەمالارى ءوز الدىنا ءبىر توبە. ول ورتاداعى جويقىن جەمقورلىقتى جويۋدان باستاپ، ءبىلىمىن شىڭداۋ مەن جۇمىس ورىندارىمەن قامتاماسىز ەتۋ مەحانيزمدەرىن قايتا قاراۋ جۇمىستارىنا ەرەكشە ءمان بەرىلۋى ءتيىس.
عىلىم جانە شىعارماشىلىق سالاسىندا جۇرگەن جاستاردى قولداپ، ارنايى گرانتتار ءبولىپ، ىزدەنۋ جۇمىستارىنا قارجى ءبولىپ، شىعارمالارىن جارىققا شىعارۋ، ناسيحاتتاۋ ءۇشىن دە ءتيىستى ءىس-شارالار قاراستىرىلعانى ءجون.
قوعامدىق ومىردە دە جاستار بەلسەندىلىگىن ارتتىرۋعا مۇمكىندىك بەرەتىن ستيمۋلدار جاساۋ كەرەك! جانە دە ول بەلسەندىلىك تەك قانا بيلىك پارتياسىنىڭ اياسىمەن شەكتەلمەۋى ءتيىس، ازاماتتىق قوعام ينستيتۋتتارىن دامىتۋعا جاستار ات سالىسپاعاندا، كىم ات سالىسادى؟ ءارتۇرلى دەڭگەيدەگى شەندىلەر مەن دەپۋتاتتارى كورپۋسىنا جاستاردى كوبىرەك تارتۋدى قولعا الۋ كەرەك دەپ ويلايمىن!
وسى جانە باسقا دا ۇسىنىستاردى قالىپتاستىرىپ، ءتيىستى شەشىم قابىلدايتىن پرەزيدەنتتىڭ الدىنا ۇسىناردىڭ الدىندا، مەنىڭشە، ينتەرنەت جانە الەۋمەتتىك جەلىلەردىڭ مۇمكىنشىلىگىن پايدالانىپ، جاستاردىڭ بۇكىلقازاقستاندىق ساۋالناماسىن ۇيىمداستىرۋ كەرەك: «جاستار جىلى» بيلىكتەن نە كۇتەدى، سونى جاستاردىڭ ءوزى ايتسىن!
ەڭ باستىسى، جاستارعا دەگەن قولداۋ 362 كۇنمەن شەكتەلىپ قانا قويماي، ودان كەيىن دە ءوز جالعاسىن تابۋى ءتيىس!
نۇرگەلدى ابدىعانيۇلى
"ادىرنا" ۇلتتىق پورتالى
