بۇگىن استانادا وتكەن «ۇركەر-2025» ۇلتتىق سىيلىعىنىڭ ماراپاتتاۋ راسىمىندە جىلدىڭ ۇزدىك جاڭالىقتار پورتالى اتاعىن «ادىرنا» ۇلتتىق پورتالى يەلەندى.
بيىل بايقاۋ 11 نوميناتسيا بويىنشا ءوتتى. بايقاۋعا ەلىمىزدىڭ تۇكپىر-تۇكپىرىنەن 400-دەن استام جۋرناليست پەن اقپارات قۇرالدارى ءوتىنىم جولداعان. ۇزدىك جۇمىستاردى بەلگىلى جۋرناليستەر مەن مەديامەنەدجەرلەردەن قۇرالعان تاۋەلسىز كوميسسيا ىرىكتەدى. ناتيجەسىندە شورت-ليستكە 44 ۇمىتكەر ەنگەن ەدى.
جىلدىڭ ۇزدىك جاڭالىقتار پورتالى اتاعىنا لايىقتى دەپ تانىلعان "ادىرنانىڭ" نەگىزىن قالاۋشى ارمان اۋباكىر الەۋمەتتىك جەلىدەگى پاراقشاسىندا ءوز لەبىزىن جازعان. «ادىرنا» رەداكتسياسى بۇل جەتىستىككە قول جەتكىزۋگە سەبەپكەر بولعان بارشا وقىرمان قاۋىمعا شىنايى العىسىن بىلدىرەدى. سىزدەردىڭ تۇراقتى نازارلارىڭىز بەن قولداۋلارىڭىز – ءبىزدىڭ ەڭ ۇلكەن جەتىستىگىمىز", - دەگەن ول.
ال ماراپاتتاۋ راسىمىندە سويلەگەن سوزىندە ارمان اۋباكىر 15 جىلدان بەرى جۇمىس ىستەپ كەلە جاتقان "ادىرنانىڭ" قيىندىقتارعا توتەپ بەرە وتىرىپ، كوماندانىڭ ارقاسىندا وسىنداي جەڭىسكە جەتكەنىن اتاپ كورسەتتى. ارمان اۋباكىر كورسەتىلگەن بارشا قولداۋعا العىس بىلدىرەتىنىن جەتكىزگەن.
«ۇركەر» سىيلىعى — وتاندىق جۋرناليستيكانىڭ بەدەلدى ماراپاتتارىنىڭ ءبىرى. ونىڭ ماقساتى — قوعامنىڭ دامۋىنا ۇلەس قوسقان، ساپالى ءارى وزەكتى اقپارات تاراتقان جۋرناليستەر مەن بۇقارالىق اقپارات قۇرالدارىن قولداۋ جانە تانىمال ەتۋ.
بيىلعى جەڭىمپازدار ءتىزىمى:
● جىلدىڭ ۇزدىك پورتالى – «Adyrna» ۇلتتىق پورتالى.
● الەۋمەتتىك تاقىرىپتاعى ۇزدىك ماتەريال – تامارا ۆاال (Vlast.kz).
● ۇزدىك وڭىرلىك باق – «استانا اقشامى» گازەتى.
● جىلدىڭ ۇزدىك جۋرناليستىك زەرتتەۋى – مايرا ەرعالي («اتىراۋ» گازەتى).
● جىلدىڭ ۇزدىك سۇحباتى – باۋىرجان كاريپوۆ (Qaz365.kz).
● راديوستانتسياداعى ۇزدىك جوبا – «نىسانا» («شالقار» ۇلتتىق راديوسى).
● جىلدىڭ ۇزدىك فوتوسۋرەتى – يگور بۋرگاندينوۆ («كازاحستانسكايا پراۆدا»).
● جىلدىڭ ۇزدىك پودكاستى – Qstar Group.
● جىلدىڭ ۇزدىك YouTube-ارناسى – «ەكسپەرتى KZ».
● جىلدىڭ ۇزدىك رەپورتاجى – يۆان سۋحورۋكوۆ (Tengrinews.kz).
● جىلدىڭ ۇزدىك اناليتيكالىق ماتەريالى – يليا پاششەنكو («كازاحستانسكايا پراۆدا»).
سونىمەن قاتار، قر ورتالىق كوممۋنيكاتسيالار قىزمەتىنىڭ ديرەكتورى اسقار وماروۆ ارنايى نوميناتسيا – «جۇمىسشى ماماندىقتارى جىلىنا ارنالعان سىيلىقتى» Zakon.kz رەداكتسياسىنا تاپسىردى.
ارنايى جۇلدەلەر:
● «ۇركەر» ۇلتتىق بايقاۋىنىڭ ارنايى سىيلىعى – «كازاحستانسكايا پراۆدا» گازەتى.
● «ۇركەر – 2025» ارنايى جۇلدەسى – «Kazinform» حالىقارالىق اقپارات اگەنتتىگىنە بەرىلدى.
