رەسەي پرەزيدەنتى ۆلاديمير پۋتين ەلىمەن دوستىق بايلانىستى ۇستاعان وزگە مەملەكەت باسشىلارى مەن ۇكىمەت باسشىلارىن جاڭا جىل مەرەكەسىمەن قۇتتىقتادى. سونىڭ ىشىندە العاشقىلاردىڭ ءبىرى بولىپ قازاقستان پرەزيدەنتى قاسىم-جومارت توقاەۆقا قۇتتىقتاۋ جولدادى، دەپ حابارلايدى "ادىرنا" ۇلتتىق پورتالى.
جاڭا جىل مەرەكەسىمەن قۇتتىقتاۋ جەدەلحاتىندا رەسەي مەن قازاق ەلىنىڭ قارىم-قاتىناسى ءسوز ەتىلگەن. وتكەن جىلعى ستراتەگيالىق ارىپتەستىك، وداقتاستىق جانە تاتۋ كورشىلىك قاعيداتتارىنىڭ الداعى ۋاقىتتا دا ارمەن قاراي قارقىندى دامۋىنا ءپۋتيننىڭ سەنىمى زور. سونىمەن قاتار، ەكىجاقتى ساۋدا-ساتتىق كولەمى جاقسى كورسەتكىشتەرمەن ەستە قالىپ، ونەركاسىپتىك، ەنەرگەتيكالىق جانە باسقا دا سالالارداعى ءىرى بىرلەسكەن جوبالار تابىستى ىسكە اسىرىلعانى دا ايتىلدى.
- ۆلاديمير پۋتين كوپ جوسپارى بار رەسەي-قازاقستان ىنتىماقتاستىعىن بىرلەسكەن كۇش-جىگەردىڭ ارقاسىندا ودان ءارى ارتتىرۋدى قامتاماسىز ەتۋگە، ەۋرازەق، ۇقشۇ، تمد جانە شىۇ شەڭبەرىندەگى ۇيلەستىرىلگەن جۇمىستى جالعاستىرۋعا قول جەتكىزەتىندىكتەرىنە سەنىم ءبىلدىردى. رەسەي پرەزيدەنتى مۇنىڭ بارلىعى باۋىرلاس حالىقتاردىڭ مۇددەسىنە ساي كەلەتىنىنە، ورتالىق ازياداعى، كاسپي وڭىرىندەگى، جالپى ەۋرازيالىق كەڭىستىكتەگى تۇراقتىلىق پەن قاۋىپسىزدىكتى نىعايتۋ باعىتىندا جۇرگىزىلىپ جاتقان ستراتەگيالىق شارالار ەكەندىگىنە سەنىمدى، - دەلىنگەن حاتتا.
سونىمەن قاتار، ۆلاديمير پۋتين ابحازيا، ءازىربايجان، ارمەنيا، بەلارۋس، قىرعىزستان، تاجىكستان، تۇرىكمەنستان، وزبەكستان، وڭتۇستىك وسەتيا، بوليۆيا، برازيليا، ۆەنگريا، ۆەنەسۋەلا، ۆەتنام، ءۇندىستان، قىتاي، كۋبا، نيكاراگۋا، سەربيا، سيريا جانە تۇركيا مەملەكەت باسشىلارىن دا قۇتتىقتادى.
رەسەي باسشىسى ءوزىنىڭ ايرىقشا ىقىلاسىن تانىتقان جەدەلحاتتى العانداردىڭ قاتارىندا نۇرسۇلتان نازارباەۆ تا بار.
"ادىرنا" ۇلتتىق پورتالى
