الماتىدا «تاعزىم» مەموريالىجايىندا الەۋمەتتىك جەلىدە بىرقاتار سىني اقپارات تارادى. بۇكىل ازاماتتىق كوعام مەن ەلدىڭ تاريحىنا ەرەكشە ماڭىزى بار ورىنعا بارعان كەي ازاماتتار اۆتورلاردىڭ كونتسەپتسياسىن دۇرىس تۇسىنبەي، بوس جەردە ورىنسىز شۋ شىعاردى. وسىعان وراي ءبىزدىڭ رەداكتسيا مەموريالدىڭ اۆتورلارى – الەكسەي يۆجەنكو مەن گايني ساعيدۋللاەۆامەن بايلانىسقا شىعىپ، قاجەتتى جاۋاپتاردى الدى.
«بەينەجازبادا كەلتىرىلگەن دەرەكتەر شىندىققا سايكەس كەلمەيدى. ەڭ الدىمەن، سويلەپ تۇرعان ادامنىڭ مۇلدەم مامان ەمەس ەكەنىن ايتۋ كەرەك. كافەل مەن گرانيتتى اجىراتا المايدى.
بۇل مەموريال جاساندى تاستاردان، كافەلدەن ەمەس، تەك تابيعي تاستاردان، ياعني گرانيتتەن، ءمارماردان، سلانەتستەن جاسالعان.
سلانەتستەن جاسالعان ستەلالاردا ونىڭ بۋىندارىنىڭ سايكەس كەلمەۋى قالىپتى جاعداي. قايعى مەن قاسىرەتتى مەڭزەيتىن بۇل ستەلالار ادەيى سولاي جاقپارلى، ياعني تەگىس ەمەس تۇردە جاسالعان»، – دەپ اتاپ ءوتتى الەكسەي يۆجەنكو.
ونىڭ ايتۋىنشا، دەكوراتيۆتى تاستاردان جاسالسا، ولار دالمە-ءدال ورناتىلاتىنى ءسوزسىز، ال كەدىر-بۇدىر تابيعي تاستاردان جاسالعاندىقتان تاستار اراسىنداعى الشاقتىقتار قالىپتى دۇنيە.
سونداي-اق، بۇل اۆتورلىق يدەيا رەتىندە جاڭا كوزقاراستا، ياعني ادەيى سولاي ىسكە اسقانىن اتاپ ءوتۋ قاجەت. كەدىر-بۇدىر قارا تاستار قاڭتارداعى جاعدايدى، قاسىرەت، قورقىنىش پەن حاوستى بەينەلەيدى.
ونىڭ ارىپتەسى گايني ساعيدۋللاەۆا گرانيتتەگى جاسالعان درەناجدىق جۇيەنى دە ءتۇسىندىرىپ ءوتتى.
«تازا گرانيتەن، ياعني تابيعي تاستان جاسالعان ەدەنۇستى پليتكا سۋ تيگەندە، اۋانىڭ ىلعالىمەن، سۋىقتا ءوز ءتۇسىن وزگەرتىپ وتىرادى. ونى كەز كەلگەن مامان بىلەدى. جوعارى ىلعالدىلىقتا گرانيتتىڭ ءتۇسىنىڭ باسقا بولىپ كورىنۋى (ونىڭ ۇستىنە تەلەفونعا تۇسىرىلگەن جازبادا) ول كىر دەگەندى بىلدىرمەيدى! ۇشىنشىدەن، جەردەگى پليتكالار اراسىنداعى الشاقتىق تا ارنايى سۋ اعاتىن ارنا رەتىندە جاسالىنعان. ياعني «ششەل» ەمەس، جاڭبىردىڭ، ەرىگەن قاردىڭ سۋى اعىپ كەتەتىن جەر»، – دەدى ارحيتەكتور.
مامانداردىڭ ايتۋىنشا، جازبا اۆتورى بىلمەستىكپەن بە، الدە باسقا ما، نەگىزى جالعان اقپارات بەرىپ، مەموريالدى قارالاپ وتىر. وسىنى ەسكەرگەن ءجون.
«ال جازبا اۆتورى اشىپ كورسەتىپ وتىرعان، ياعني جۇلىنىپ قالدى-مىس دەگەن پليتكاعا كەلسەك، ول شىندىق بولۋى مۇمكىن، ارينە. بىراق، وسىنشاما جالعان سويلەگەن ادامنىڭ ونى ادەيى جۇلىپ الماسىنا كىم كەپىل؟ قىس مەزگىلىندە – اۋا تەمپەراتۋراسى تومەن كەزدە جۇرگىزىلگەن سوڭ كەز-كەلگەن قۇرىلىسشى، ساۋلەتشى بەلگىلى ءبىر تاۋەكەلدىڭ، سىزات، جارىقشاقتىڭ بولاتىنىن بىلەدى.
اۆتورلىق بۇل جوبا ءبىزدىڭ باقىلاۋىمىزدا، كەپىلدىك مىندەتتەمە بويىنشا كەمشىلىكتەر تۇزەتىلەدى دەپ سەنىمدى تۇردە ايتامىز. بۇل زاڭ تالابى. قازىر كەي پليتا اۋىستىرىلدى، قاجەتتى جۇمىستار جۇرگىزىلىپ جاتىر»، – دەدى ماماندار.
«بىتكەن ىسكە سىنشى كوپ» دەگەن. كاسىبي قوعامداستىق ءبىزدىڭ جۇمىسقا وڭ پىكىر ايتىپ، جاقسى باعا بەرگەن. سول سەبەپتى تىرناقتىڭ استىنان كىر ىزدەگەن ادام قانشا شەدەۆر جاساساڭ دا، كەمشىلىك تابادى. بەينە ءتۇسىرىپ، حايپ جاساپ، ۇپاي جيناعانشا مەموريالدى جاقسارتۋدىڭ جولىن بىرگە ىزدەگەنىمىز ابزالىراق بولار ەدى»، – دەپ قورىتىندىلادى يۆجەنكو.
ايتا كەتەيىك، الماتىداعى «تاعزىم» مەموريالى 23 جەلتوقسان كۇنى اشىلعان بولاتىن.
Dalanews.kz
