قىتايدا ءومىر سۇرگەن ەتنيكالىق قازاق، ايگىلى جازۋشى، پروفەسسور، اۋدارماشى، شىڭجاڭ وقۋ-اعارتۋ ينيستيتۋتىنىڭ بۇرىنعى رەكتورى، ءتىل مامانى، ادەبيەتتانۋشى-عالىم اۋەلقان قاليۇلى 83 جاسقا قاراعان شاعىندا قىتايدىڭ ءۇرىمجى قالاسىندا قايتىس بولدى. بۇل جايلى "ادىرنا" ۇلتتىق پورتالى حابارلادى.
عالىمنىڭ ونەگەلى ءومىرى كوپكە ۇلگى بولىپ، عىلىمي ايدىندا ۇشان-تەڭىز مول مۇراسى قالدى.
اۋەلحان قاليۇلى 1939 جىلى قحر اۋماعىنداعى شىڭجاڭ، التاي ايماعىنىڭ بۋرىلتوعاي اۋدانى جەتىارال اۋىلىندا دۇنيەگە كەلگەن. شىڭجاڭ پەداگوگيكالىق ينستيتۋتىن بىتىرگەن. سول ينستيتۋتتا (1959-1978), شىڭجاڭ ۋنيۆەرسيتەتىندە (1978-1995) ساباق بەردى. 1995 جىلدان شىڭجاڭ وقۋ-اعارتۋ ينستيتۋتىنىڭ رەكتورى بولعان.
ونىڭ قازاق ءتىلى مەن ادەبيەتى ماسەلەلەرىن زەرتتەۋگە ارنالعان «جازۋشىلىقتىڭ نەگىزدەرى»، «قازىرگى قازاق ءتىلىنىڭ ستيليستيكاسى» سەكىلدى شىعارمالارى جوعارى وقۋ ورىندارىندا جەكە ءپان رەتىندە وقىتىلعان. «قازاق اۋىز ادەبيەتىنە شولۋ» اتتى مونوگرافيالارى جانە «ادەبيەتىمىز تۋرالى كەيبىر ويلار» دەپ اتالعان عىلىمي ماقالالار جيناعى، «بيىكتەگەن تام» اڭگىمەلەر مەن ەسسەلەر جيناعى، «اۋىرلىقتى جەر كوتەرەدى» پەسالار جيناعى جارىق كوردى. «قازاقتىڭ بايىرعى تۇرمىس-سالت جىرلارى» دەگەن كىتابى اعىلشىن تىلىندە جاريالانعان.
اۋەلقان قاليۇلىنىڭ ءومىربايانى «قىتاي وقۋ-اعارتۋ ماماندارى»، «قىتاي ماماندارىنىڭ ءىرى سوزدىگى»، «قىتاي جازۋشىلارىنىڭ قىسقاشا ءومىربايانى»، «قىتايداعى قازاق ماماندارى»، «قازاقستان ۇلتتىق ەنتسيكلوپەدياسى»، «XX عاسىرداعى قىتاي قالامگەرى» قاتارلى كوپتەگەن ءىرى كىتاپتارعا ەنىپ، ونىڭ ەڭبەكتەرى كەڭىنەن تانىستىرىلعان.
قازاق اتىن ابىرويمەن ۇستاپ، ماعىنالى عۇمىر كەشكەن مارقۇمنىڭ يمانى سالامات بولسىن!
"ادىرنا" ۇلتتىق پورتالى
