ەل اۋماعىندا «AMANAT» پارتياسى فيليالدارىنىڭ كونفەرەنتسيالارى جالعاسىپ جاتىر. بۇگىن «AMANAT» پارتياسى قاراعاندى وبلىستىق فيليالىنىڭ كەزەكتەن تىس ءحححىح كونفەرەنتسياسى ءوتتى.
ءىس-شاراعا «AMANAT» پارتياسىنىڭ اتقارۋشى حاتشىسى، ايماقتاعى ساياسي كەڭەس مۇشەلەرى، بارلىق دەڭگەيدەگى ءماسليحات دەپۋتاتتارى، قوعامدىق كەڭەستەر مۇشەلەرى، باستاۋىش پارتيا ۇيىمدارى مەن «جاستار رۋحى» جاستار قاناتىنىڭ وكىلدەرى قاتىستى.
پارتيانىڭ اتقارۋشى حاتشىسى اسحات ورالوۆ اماناتتىقتاردىڭ الدىندا دەموكراتيالىق قاعيداتتارعا نەگىزدەلگەن ادىلەتتى قازاقستاندى قۇرۋ مىندەتتەرى تۇرعانىن اتاپ ءوتتى.
«AMANAT» پارتياسى – مەملەكەت باسشىسىنىڭ قوعامدىق تىرەگى. ونىڭ باستى مىندەتى – قاسىم-جومارت توقاەۆتىڭ رەفورمالارىن ىسكە اسىرۋعا قولداۋ كورسەتۋ ءۇشىن ازاماتتاردى بىرىكتىرۋ. بۇعان ءبىزدىڭ كۇش-قۋاتىمىز جەتەتىنىنە سەنىمدىمىن. «AMANAT» پارتياسىنىڭ مۇشەلەرى – تۇعىردا تۇرعان تۇراقتىلىقتى ساقتاۋدى، ادىلدىكتى قولداۋدى، ءار وتباسىنىڭ ءال-اۋقاتىن ارتتىرۋدى كوزدەيتىن بەلسەندى ادامدار»، – دەدى ول.
اسحات ورالوۆ اماناتتىقتار ءار ايماقتىڭ ەرەكشەلىگىن ەسكەرە وتىرىپ حالىقتىڭ الەۋمەتتىك-ەكونوميكالىق جاعدايىن جاقسارتۋعا باعىتتالعان پارتيالىق جوبالاردى ىسكە اسىرۋ جۇمىسىن كۇشەيتۋى ءتيىس ەكەنىن اتاپ ءوتتى.
قاراعاندى وبلىستىق ماسليحاتىنداعى «AMANAT»-تىڭ دەپۋتاتتارى اتقارعان جۇمىس تۋرالى پارتيانىڭ دەپۋتاتتىق فراكتسياسىنىڭ باسشىسى قاديشا وسپانوۆا باياندادى. ماسەلەن، حالىق قالاۋلىلارى بالالارعا ارنالعان شيپاجايلاردى قارجىلاندىرۋ ءتاسىلىن قايتا قاراپ، وڭىردە ارناۋلى الەۋمەتتىك قىزمەت كورسەتۋ ساپاسىن جاقسارتۋ بويىنشا بىرقاتار باستاما كوتەردى. سونداي-اق، اماناتتىق دەپۋتاتتاردىڭ قولداۋىمەن قاراعاندىدا مۇمكىندىگى شەكتەۋلى جانە ونكولوگيالىق اۋرۋلارى بار بالالارعا ارنالعان پاللياتيۆتىك ورتالىق اشىلدى.
«بيىل دەپۋتاتتىق كورپۋس 11 سەسسيا وتكىزىپ، وندا پارتيانىڭ سايلاۋالدى باعدارلاماسىندا كورسەتىلگەن ماسەلەلەر كوتەرىلدى. قابىلدانعان 125 شەشىمنىڭ 22-ءسى – نورماتيۆتىك قۇقىقتىق اكتىلەر. دەپۋتاتتاردىڭ نەگىزگى جۇمىسى باعىتى – سايلاۋشىلارمەن كەرى بايلانىس ورناتۋ. سايلاۋشىلارمەن باس-اياعى 500-گە جۋىق كەزدەسۋ ۇيىمداستىرىلدى. پارتيا الاڭدارىندا ازاماتتاردى جەكە قابىلداۋ ۇنەمى وتكىزىلەدى»، – دەدى ول.
كونفەرەنتسيا بارىسىندا بەكزات التىنبەكوۆ اشىق داۋىس بەرۋ ارقىلى پارتيا فيليالىنىڭ توراعاسى بولىپ سايلاندى. ول بۇعان دەيىن فيليالدىڭ اتقارۋشى حاتشىسى قىزمەتىن اتقارعان بولاتىن. ءوز سوزىندە ول پارتيانىڭ سايلاۋالدى باعدارلاماسىن ىسكە اسىرۋ بارىسىنا توقتالدى.
«مىسالى، بيىل وڭىردە 400 مىڭ شارشى مەتردەن استام تۇرعىن ءۇي سالىندى. بۇل شامامەن 3600 پاتەردى قۇرايدى. قاراعاندى جانە تەمىرتاۋ قالالارىنداعى 2 مىڭنان استام تۇرعىن ۇيگە گاز تاراتۋ جەلىلەرى تارتىلدى. وبلىس اۋماعىنداعى مەكتەپكە دەيىنگى ءبىلىم بەرۋ مەكەمەلەرىندە 2 مىڭ ورىن اشىلدى. قاراعاندى قالاسىندا 28 بالالار سپورت الاڭى ورناتىلىپ، 600 وقۋشىعا ارنالعان مەكتەپ سالىندى. شاحتينسك قالاسىندا اۋتيزمگە شالدىققان بالالاردى قولداۋ ورتالىعى اشىلدى»، – دەپ اتاپ ءوتتى بەكزات التىنبەكوۆ.
قاراعاندى وبلىسىندا پارتيا قاتارىندا ءوڭىردىڭ 34 مىڭنان استام تۇرعىنى بار، 271 باستاۋىش پارتيا ۇيىمى جۇمىس ىستەيدى.
سونداي-اق، وسى اپتادا ەلىمىزدىڭ بىرقاتار وڭىرىندە پارتيالىق كونفەرەنتسيالار ءوتىپ، وندا «AMANAT»-تىڭ وبلىستىق فيليالدارىنىڭ جاڭا توراعالارى سايلاندى. ماسەلەن، اقمولا وبلىسىندا – اينا ءمىسىرالىموۆا, پاۆلودار وبلىسىندا – يليا تەرەنچەنكو, اباي وبلىسىندا – قۋانىش سۇلەيمەنوۆ بولدى. سقو-دا – اسەم راحمەتوۆا, شقو-دا سايرانگۇل ءجۇمادىلوۆا وبلىستىق فيليالدىڭ توراعاسى بولىپ سايلاندى.
