پوليتسيا پولكوۆنيگى شۋلى ۆيدەودان كەيىن قىزمەتىنەن ايىرىلدى

3229
Adyrna.kz Telegram
فوتو: ۆيدەودان الىندى
فوتو: ۆيدەودان الىندى

تۇركىستان وبلىسى قازىعۇرت اۋداندىق پوليتسيا ءبولىمى باستىعىنىڭ ورىنباسارى اتىشۋلى بەينەجازبادان كەيىن قىزمەتىنەن بوساتىلدى. بۇل تۋرالى تۇركىستان وبلىسى پوليتسيا دەپارتامەنتىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى. 

ۆەدومستۆونىڭ مالىمەتىنشە، پوليتسيا پولكوۆنيگى باۋىرجان الدابەرگەنوۆ بەينەگە جاعىمسىز تۇردە تۇسىرىلگەن. بەينەجازبا اۆتورى اۋداندىق پوليتسيا ءبولىمى باستىعىنىڭ ورىنباسارىن تانىعان. ۆيدەودا ەر ادام فورماداعى قىزمەتكەرلەرگە فيزيكالىق كۇش قولدانادى. اۆتوردىڭ ايتۋىنشا، وسىلايشا پولكوۆنيك اقشا بوپسالاعان.

"كوميسسيا قورىتىندىسى بويىنشا اتالعان بەينەجازباداعى باستىقتىڭ ورىنباسارى قىزمەتتەن بوساتىلدى. جەكە قۇرام اراسىندا قىزمەتتىك ءتارتىپ پەن زاڭدىلىقتى نىعايتۋ جانە سىبايلاس جەمقورلىققا قارسى ءىس – قيمىل بويىنشا كەشەندى جۇمىس جالعاسىپ جاتىر", - دەپ حابارلادى وبلىستىق پوليتسيا دەپارتامەنتى.

بۇل فاكت بويىنشا قىلمىستىق كودەكستىڭ 362-بابى "بيلىك پەن لاۋازىمدىق وكىلەتتىكتى اسىرا پايدالانۋ" بويىنشا سوتقا دەيىنگى تەرگەۋ جالعاسىپ جاتىر.

وسى باپ بويىنشا، جاۋاپتى لاۋازىمدا جانە قىزمەتتىك جاعدايىن پايدالانا وتىرىپ جاسالعان زاڭبۇزۋشىلىقتار ءۇشىن بەس جىلدان ون جىلعا دەيىنگى مەرزىمگە باس بوستاندىعىنان ايىرۋ، مۇلكى تاركىلەنىپ، بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان ءومىر بويىنا ايىرۋ جازاسى قاراستىرىلعان.

پىكىرلەر