ۋكراينا پرەزيدەنتى پەتر پوروشەنكو پاتريارح فيلارەتكە ۋكراينا باتىرى اتاعىن بەردى. بۇل تۋرالى "ازاتتىق" راديوسى حابارلايدى. پوروشەنكو فيلارەتتىڭ ۋكراين پراۆوسلاۆيە شىركەۋىنىڭ تاۋەلسىزدىك الۋ جولىنداعى كۇرەسىنە قوسقان ۇلەسىن ەرەكشە باعالادى.
"ول ۋكراين حالقىنىڭ رۋحاني جەتەكشىسى جانە سولاي بولىپ قالا بەرەدى. سول سەبەپتى وعان "ۋكراينا باتىرى" اتاعىن بەردىم" دەپ جازدى پرەزيدەنت Facebook-تەگى پاراقشاسىندا.
پاتريارح فيلارەت (دەنيسەنكو) كيەۆ پاتريارحاتىنىڭ ۋكراين پراۆوسلاۆيە شىركەۋىن باسقارعان. شىركەۋ 1992 جىلى ۋكراين پراۆوسلاۆيە شىركەۋىنە قاراستى ءدىن قىزمەتكەرلەرى مەن پريحودتاردىڭ ءبىر بولىگى ورىس پراۆوسلاۆيە شىركەۋىنەن تاۋەلسىزدىگىن جاريالاعان سوڭ قۇرىلعان. الەمدەگى وزگە پراۆوسلاۆيە شىركەۋلەرى ۋكراين اۆتوكەفالدى پراۆوسلاۆيە شىركەۋى مەن كيەۆ پاتريارحاتىنىڭ ۋكراين پراۆوسلاۆيە شىركەۋىن مويىندامايدى.
15 جەلتوقساندا كيەۆتە سوبور ءوتىپ، كيەۆ پاتريارحاتىنىڭ ۋكراين پراۆوسلاۆيە شىركەۋى مەن ۋكراين اۆتوكەفالدى پراۆوسلاۆيە شىركەۋى بىرىكتى. بۇل ەكى شىركەۋدىڭ بازاسىندا جەرگىلىكتى پراۆوسلاۆيە شىركەۋى قۇرىلدى. كيەۆ ءميتروپوليتى بولىپ 39 جاستاعى ەپيسكوپ ەپيفاني سايلاندى. فيلارەت ول سوبوردا ءوز كانديداتۋراسىن ۇسىنبادى. بۇكىلالەمدىك پاتريارحات ۋكراينادا قۇرىلعان جاڭا شىركەۋدى مويىنداپ، 6 قاڭتاردا وعان اۆتوكەفاليا ء(وزىن-ءوزى باسقارۋ قۇقىعى) تۋرالى قۇجات بەردى.
"ادىرنا" ۇلتتىق پورتالى
