Máskeýde TMD-ǵa múshe elder jazýshylarynyń egemendik jyldarynda jazǵan shyǵarmalaryn arqaý etken iri antologııa jaryq kórdi. Antologııaǵa engen qazaq jazýshylarynyń týyndylary keleshekte 11 tilge aýdarylyp, jarty álemniń oqyrmandaryna jol tartpaq. Bul jaıly "Adyrna" ulttyq portaly habarlady.
Igi bastama jaıly prozashy Nurjan Qýantaıuly habarlady:
- Máskeýden orys tilinde "TMD memleketteriniń qazirgi ádebıeti" serııasymen "Proza" janry boıynsha 1200 bettik antologııa jaryq kóripti. Oǵan Baltyq jaǵalaýy elderinen basqa 11 memleket jazýshylarynyń kórkem shyǵarmalary (áńgime, novella) engizilipti. Antologııanyń "Zamanaýı qazaq ádebıeti. Proza" bólimine bizdiń de "Balkon", "Bátińke", "Úreıli úsh kún" degen áńgimelerimiz qosylypty. Táýelsizdik jyldarynyń basyndaǵy ádebıet tańdalyp alynypty. Taıaýda poezııa men balalar ádebıeti de dál osyndaı kitap bolyp basylyp shyǵady deıdi. Sodan keıin osy úsh tomdyq antologııa on bir elde aýdarylyp jaryq kórmek. Bul ıgilikti sharýany OGI (Obedınennoe gýmanıtarnoe ızdatelstvo) men Reseı Jazýshylar odaǵy jáne on bir memlekettiń Jazýshylar odaǵy birlesip atqaryp jatyr eken. Bar shyǵyndy máskeýlikter ózderi kóterip alǵan kórinedi. Qazaq ádebıeti tarapynan osy jobaǵa atsalysqan talantty aqyn Erjan Alashtýǵan baýyryma alǵys aıtamyn. Joba jalǵasyn taba bersin! - dep jazdy qalamger.
"Adyrna" ulttyq portaly
