مۇرات باقتيارۇلى،
قر سەناتىنىڭ دەپۋتاتى;
"قاراعاندىداعى "قاندى" وقيعا ەشكىمدى بەيجاي قالدىرماگانى انىق. ورىمدەي جاس ازامات قانىشەرلەردىڭ قولىنان اجال قۇشتى. بارلىق تۋعان تۋىستارىنىڭ قايعىسىنا ورتاقتاسىپ كوڭىل ايتامىن. قانىشەرلەر ءتيىستى جازالارىن الۋ كەرەك.
جالپى "قازاقستان كوپ ۇلتتى مەملەكەت" دەگەن قاعيداتتى وزگەرتۋىمىز كەرەك.
ىقىلىم زاماننان بەرى قازاقستاندا مەكەندەيتىن، قازاق مەملەكەتىن قۇرايتىن، ۇلانعايىر دالانىڭ يەسى دە، كيەسى دە ءبىر- اق ۇلت بار، ول - قازاق ۇلتى. قالعاندارى ەتنيكالىق دياسپورالار. ولاردىڭ بارلىعىنىڭ دەرلىك ءوز وتاندارى بار. قازاقتىڭ قازاقستاننان باسقا وتانى جوق. سوندىقتان دا قازاق ۇلتىنىڭ مۇددەسى تەك وسى ەلدە عانا قورعالادى. الەمدە ەتنيكالىق از توپتارعا بارلىق جاعدايلار جاسالعان مەملەكەت قازاقستاندا عانا. تەك قازاقستاندا عانا.
ۇلكەن وكىنىشكە وراي، مەملەكەتتىك ءتىلدى بىلمەي-اق مەملەكەتتىك قىزمەت اتقارۋعا، بيزنەس جاساۋعا بولادى. سونى باعالاپ، قادىرلەي بىلمەگەن وزگە ەتنوستاردىڭ كەيبىر وكىلدەرىنە "تاريحي وتاندارىڭا جولدارىڭ اشىق" دەگىم كەلەدى. كەشە ارمەنيا پارلامەنتىنىڭ دەپۋتاتى ە. مارۋكيان ارمەنياداعى قازاقستاننىڭ ەلشىسىن شاقىرتىپ، قازاقستانداعى "ارمياندارعا كورسەتىلىپ جاتقان قىسىمدارعا" بايلانىستى تۇسىندىرمە بەرۋىن تالاپ ەتىپتى. بۇل - قازاقستاننىڭ ىشكى ىستەرىنە قول سۇعۋشىلىق. بۇعان ءبىزدىڭ ءسىم تەز ارادا ءتيىستى رەسمي جاۋابىن بەرۋى ءتيىس."
"ادىرنا" ۇلتتىق پورتالى
