قر ەڭبەك جانە حالىقتى الەۋمەتتىك قورعاۋ مينيسترلىگى، كوشى-قون كوميتەتى توراعاسىنىڭ مىندەتىن اتقارۋشى ءىلياس يسپانوۆ قازىر ەلىمىزدە قانشا رەسەيلىك قاشقىن بار ەكەنىن باياندادى. ونىڭ ايتۋىنشا، ەلدە 298 مىڭعا جۋىق رەسەي ازاماتى بار، ونىڭ 30 مىڭى قازاق ەلىندە تۇراقتى جۇمىس ىستەپ ءجۇر. بۇل جايلى "ادىرنا" ۇلتتىق پورتالى حابارلادى.
رەسەيدە سوعىسقا وراي موبيليزاتسيا جاريالانعالى بەرى قازاق ەلى اۋماعىنا 837 مىڭ ادام كەلىپ، 780 مىڭ ادام كەتكەنىن اتاپ ءوتتى.
"بۇگىنگى تاڭدا ەلىمىزدە ءارتۇرلى سەبەپتەرمەن 298 مىڭعا جۋىق رەسەيلىك ءجۇر. ونىڭ ىشىندە 30 مىڭ ادام كەلىسىم-شارت بويىنشا جۇمىس ىستەيدى، سونىڭ نەگىزىندە ۋاقىتشا تۇرۋ تىركەۋى بار. قازاقستاندا 20 مىڭعا جۋىق ستۋدەنت وقيدى", - دەدى ءىلياس يسپانوۆ.
سونىمەن قاتار كەيبىر رەسەي ازاماتى قازاقستاندى ترانزيتتىك ەل رەتىندە پايدالاندى. 21 قىركۇيەكتەن بەرى 198 مىڭعا جۋىق ادام قازاقستان ارقىلى باسقا ەلدەرگە ۇشىپ كەتكەن.
ەسكە سالا كەتەيىك، 21 قىركۇيەكتە رەسەي پرەزيدەنتى ۆلاديمير پۋتين ءىشىنارا موبيليزاتسيا جاريالادى. ول شارا 31 قازاندا اياقتالدى.
"ادىرنا" ۇلتتىق پورتالى
