الەمنىڭ ەڭ ۇزدىك فۋتبولشىسى كىم؟ بۇل سۇراقكوپكە ۇناماۋى مۇمكىن. سەبەبى، سۇراق توڭىرەگىندە كەلىسپەۋشىلىك كوپ. ءبىرى – رونالدۋ، ەكىنشىسى – ازار، ەندىگىسى – كوۋتينو دەر. ءبارى ءارتۇرلى سانات بويىنشا ۇزدىك. سول كاتەگوريالاردى ءبىر ويىنشىدان ىزدەسەڭىز، جاۋابى – مەسسي. ارگەنتينادا روساريو اتتى قالا بار. سول قالادا كىشكەنتاي لەو ارمانىن الا دوپپەن بايلانىستىرعان. سان لۋيس كوشەسىمەن دوپ تەۋىپ كەلە جاتىپ، كەيىن ءوز اتىندا كوشە بولارىن سەزدى مە ەكەن؟ مارتين ميگەل دە گيۋمەس ەسكەرتكىشىن كورگەندە، وزىنە ءبىر ەمەس، ءۇش ەسكەرتكىش قويىلارىن ويلادى ما ەكەن؟ كىم ءبىلسىن؟ بىراق ونىڭ ءبىر ويى بەلگىلى. ول فۋتبولمەن ماڭگى بىرگە بولعىسى كەلدى. اجەسى جانىنا ەرتكەن بالا بۇگىن ءبىرتۇرلى قوبالجۋلى. تۇندەگى جاي مازا بەرەر ەمەس. ءتۇسى مە، ءوڭى مە بەلگىسىز، وعان ءبىر كىسى كەلدى. قولىندا دوبى بار. ورتاشا بويلى، اققۇبا كەلگەن، ساقالى بار. كيگەن كيىمىنە قاراعاندا، فۋتبولشى سەكىلدى. قولىنداعى دوپتى ۇستاتىپ جاتىپ، «قانداي قيىندىق كەزدەسسە دە، ارمانىڭنان باس تارتپا» دەدى. لەوعا قاراپ تۇرىپ، جىلى شىرايمەن جىميدى. ەندى ءتىل قاتامىن دەگەنشە، بەينە جوق بولىپ كەتتى. كىشكەنتاي اندرەس ۇزاق ويلانىپ جاتىپ، ۇيقىعا كەتتى. تاڭەرتەڭ اجەسى كۇندەگى ادەتىمەن نەمەرەسىن وياتتى. تاڭعى اسىن ىشكىزىپ، لەونى كەزەكتى جاتتىعۋعا اپارماق. ءسۇت ءىشىپ وتىرعان نەمەرەسىنە بۇگىن مەديتسينالىق تەكسەرىستەن ءوتۋ كەرەك ەكەنىن ءتۇسىندىرىپ جاتىر. لەونى كيىندىرىپ، كەرەك-جاراعىن الىپ، سپورت قالاشىعىنا بەت الدى. جول بويى لەو كەشەگى عاجايىپتىڭ جۇمباعىن شەشۋمەن دال بولدى. «نەگە فۋتبولشى اعا ماعان كەلدى؟ ايتقان ءسوزى قانداي اسەرلى. سپورت فورماسىن ايتساڭشى. ماعان بەرگەن دوبى دا وزگەشە سەكىلدى. روساريودا ونداي دوپ جوق» دەگەن سان سۇراق بالانىڭ مازاسىن قاشىردى. اجەسىنە ايتقىسى-اق كەلەدى. ايتايىن دەسە، ونسىز دا جاسى كەلگەن قارتتى مازالاعىسى كەلمەيدى. بار تىرلىگىن تاستاپ، وسى بالانىڭ قامىمەن ءجۇر. سەليا اجە نەمەرەسىنىڭ ءوزگەدەن ەرەك ەكەنىن جاقسى تۇسىنەدى. كىشكەنتايىنان ءالسىز، ءجيى اۋىرادى. سوندىقتان بالانىڭ بولاشاعىنا الاڭدايدى. الاڭدايدى دا، جانىنان ءبىر ەلى ايىرىلمايدى. ءار نارسەنى ويلاپ، قالاشىققا قالاي جەتكەنىن بىلمەي دە قالىپتى. اجەسى مۇنى بىردەن تەكسەرىس ءجۇرىپ جاتقان جەرگە اكەلدى. ماريولار باياعىدا كەلگەن ەكەن، سانچەستى دارىگەرلەر تەكسەرىپ جاتىپتى. اجەسىمەن بىرگە كەزەككە تۇردى. باقسا، تەكسەرىس بۇرىنعىعا ۇقسامايدى. مۇنىڭ الدىندا ءبىر توپ بالا قان تالداماسى مەن فليۋروگرافيادان وتكەن. سونىڭ ءناتيجەسىن حابارلاپ، وعان قوسا تاعى بىرنەشە تەكسەرۋدەن وتەدى ەكەن. كوپ كۇتپەي لەونىڭ كەزەگى كەلدى. مەدبيكە اجەسى ەكەۋىن باس دارىگەردىڭ كابينەتىنە اپاردى. دارىگەر جىلى امانداسىپ، ءمان-جايدى ءتۇسىندىرىپ جاتىر. – سەليا حانىم، تالداما ءناتيجەلەرى كوڭىل قۋانتپايدى. لەونىڭ ءوسۋ گارمونى توقتاعان. كەرەكتى ەم-دوم شارالارىن جاساماساق، بالا ارى قاراي وسپەي قالادى. وسپەسە، فۋتبول ويناۋدى دا دوعارۋ كەرەك. لەو ونسىز دا كىشكەنتاي، جالعاستىرا بەرسە، سۇيەككە زاقىم كەلەدى. اجەسىنىڭ جانارىنا جاس تولىپ كەتتى. نەمەرەسىنە ۇزدىگە قاراپ تۇرىپ، دارىگەردەن باعاسىنا قاراماي ەمدەۋ كۋرسىنان وتەتىنىن ايتتى. دارىگەر اعاي اجەسىنە ءبىردەڭەلەردى ءتۇسىندىرىپ جاتىر. ول ەندىگى سوزدەردى ەستىمەدى. لەونىڭ قيال الەمىنىڭ كۇل پارشاسى شىقتى. وسىدان 10 مينۋت بۇرىن ويىندا «الەمنىڭ ۇزدىك ويىنشىسى بولام» دەگەن ماقسات بار-دى. اق-كوك جەيدەدە مارادونا سياقتى ارگەنتينالىقتاردىڭ ارمانىن ورىنداعىسى كەلەتىن. ەندى قايتپەك؟ ويىنا تۇندەگى جايت ءتۇستى. «تۇرا تۇر، فۋتبولشى اعا ءبارىن بىلگەن ەكەن عوي. مەنىڭ قايتكەندە دە، ارمانىمنان باس تارتپاۋىم كەرەك. سوندا مەن دە ءدال سول اعاي سەكىلدى بولامىن» دەدى ىشىنەن. ەندىگىدە ءوزىن قامشىلاماققا بەكىندى. ەشتەڭەگە قاراماستان، جاتتىعۋلاردى جىبەرمەي، بارىنەن شيراق قيمىلداۋعا تىرىسادى. ءوزى ءۇشىن جانىن سالىپ جۇرگەن اجەسىنىڭ، اتا-اناسىنىڭ ءۇمىتىن اقتاعىسى كەلەدى. مەسسيگە كۇندە ءوسۋ گارمونىن كۇشەيتەتىن ءدارى بەرەدى، ينە سالادى. باسىندا ينەدەن اۋىرسىناتىن، قازىر ۇيرەنىسىپ قالدى. جاتتىعۋدىڭ ءبىرىن جىبەرمەيتىن بولدى. اجەسى وياتپاي-اق، ءوزى ەرتەمەن تۇرادى. ءبىر جىلدىڭ ىشىندە لەودا كادىمگىدەي وزگەرىس بار. دەنە-تۇرقى وسكەن، ويىن جۇيەسى دە وزگەرگەن. اكەسى جاتتىقتىراتىن «گراندوليدان» «نيۋەللس ولد بويزعا» اۋىسقان. اكەسى بولعانمەن، كلۋبتا قاتال باپكەر. بالاسىنا ارتىعىمەن جاتتىعۋ جاساتادى. سونىڭ ارقاسىندا بولار، لەو ويىنعا توسەلىپ الدى. شابۋىلدا نەبىر سويقاندى باستايدى. نيۋەللس جانكۇيەرلەرى ونىڭ الاڭداعى سيقىرىنا ۇيرەنىپ العان. ويىن سايىن قولداۋ بىلدىرۋگە كەلەدى. سەليا اجەسى دە نەمەرەسىنىڭ ءبىر ويىنىنان قالمايدى. بىردە اكەسى لەونىڭ كەزەكتى ويىنىن تاسپاعا تۇسىرگەن. ونىڭ نە قاجەتى بارىن بالا تۇسىنبەدى. حورحە مۇنى جايدان-جاي ىستەمەدى. ۇلىندا ەرەكشە تالانتتىڭ بارىن بىلەدى. بىراق دەنساۋلىعىنداعى كىناراتى مەن قولىنىڭ قىسقالىعى قىنجىلتادى. وسى كوكتەمدە «ريۆەر پلەيت» لەونى ساتىپ العىسى كەلگەن. الايدا قاجەتتى ەم-دوم شارالارىنا اقشالارى جەتپەيتىنىن ايتتى. مەسسي جانۇياسى كۇندەلىكتى سالىناتىن ينە مەن دارۋمەندەرگە اقشانى ازەر تاۋىپ ءجۇر. اكەسىنىڭ ەندىگى ءۇمىتى – ويىن بەينەلەنگەن تاسپادا. دوستارى تاسپانى «بارسەلوناعا» جىبەرۋگە كەڭەس بەرگەن. حورحە اتاقتى لا-ماسيا تۋرالى ءجيى ەستيتىن. جاس تالانتتاردىڭ باعىن اشاتىن فۋتبول اكادەمياسى ەكەنىنەن حابارى بار. بۇگىن سول كلۋبتان جاۋاپ كەلۋ قاجەت. كەشكە قاراي جاتتىعۋدى اياقتاپ، زاتتارىن جيناستىرۋعا كابينەتىنە كەلدى. كەلسە، ۇستەل ۇستىندە كونۆەرت جاتىر. جازۋىن وقىپ، كوزى شاراسىنان شىعىپ كەتكەن. ءدال ءوزى كۇتكەن حات. اقىرى كەلىپتى. ءۇمىتىن ۇزە باستاپ ەدى، كەلگەنى وسىنداي جاقسى بولار ما؟ اشىپ كوردى، ىشىندە ەكى بيلەت پەن حابارلاما تۇر. «بارسەلونا» لەونى بازاسىنا شاقىرىپتى. 17 ماۋسىمدا كاتالونيا استاناسىندا بولۋلارىن ءوتىنىپتى. كەشكى استا جاڭالىقتى ەستىگەن لەونىڭ كوڭىلى الابۇرتتى. اسىن ىشپەستەن، دوبىن الىپ دالاعا شىعىپ كەتتى. تەۋىپ كەلە جاتىپ، دوستارىن، كوشەسىن، مەكتەبىن ويلادى. ولاردى قالاي قالدىرىپ كەتپەك؟ انتونەلانى شە؟ لۋكاسپەن بىرگە «ريۆەر پلەيتتا» وينايمىز دەۋشى ەدى عوي. دوسى مۇنى ساتقىنعا بالاسا قايتپەك؟ كوشەنىڭ باسىنا جەتە بەرە، ارتقا بۇرىلدى. قاراسا، ەشكىم جوق، قاس قارايىپ كەتىپتى. كوزىمەن اسپاندى ءبىر شالدى. بيىكتە ءبىر جۇلدىز ەرەكشە جارقىرايدى. قايتا قاراعىسى كەلدى. ۇزاق قاراپ تۇردى. بىردە جۇلدىز ىشىنەن الگى دوپ بەرگەن اعايدى كورگەندەي بولدى. ءوز ويىنان شوشىنعان سەكىلدى. ارتىنشا، مۇنىڭ ءبىر بەلگى ەكەنىن ءتۇسىندى. نە بولسا دا، تاۋەكەل دەستى. بىراق تانىمايتىن قالاعا قالاي بارماق؟ بارسەلونانى روساريوداعىداي باعىندىرا الار ما ەكەن؟ لا ماسيا جىلى شىراي تانىتا ما؟ سانسىز ساۋالداردىڭ جاۋابىن ىزدەگەنشە، بارسەلوناعا اتتاناتىن كۇن تۋدى. ەرتەمەن تۇرىپ، روساريونىڭ تاڭعى اۋاسىمەن تىنىستاعىسى كەلدى. «ەل چە گەۆارادان» باستاپ، روساريونىڭ ورتالىق ستاديونىنا دەيىن ارالاپ شىقتى. قيماستىق بار. سانتا-فەمەن بايلانىستى بالالىق بار. روساريودان بۋەنوس ايرەسكە جۇرەتىن اۆتوبۋس كەلدى. اۆتوبۋسقا وتىراردا، ونە بويى جانسىز قالعانداي كۇي كەشتى. اجەسى ۇلكەن ومىرگە قادام باسقانىن، ەندى ەركەلىككە ورىن جوعىن ەسكەرتتى. دوستارى، اتا-اناسى، تۋىستارى شىعارىپ سالىپ جاتىر. لۋكاس پەن انتونەللا دا بار. انتوعا ۇزىك-ۇزىك قاراپ قويادى. بۇل كاتالونياعا كەتكەندە، ءبىرى قاعىپ كەتە مە دەپ قورقادى. ارتىنشا، اعاسى لۋكاس قاراپ جۇرەر دەپ ءوزىن سابىرعا شاقىرادى. سانتا-فە جاققا ويلانا قارايدى. بالا ليونەلدى روساريو كوشەلەرىنىڭ بىرىندە قالدىرعانىن ۇعىنادى. كەلەسى كەلگەنىندە، ءبارى باسقاشا بولاتىنىن سەزەدى. اۆتوبۋس روساريونى ارتقا تاستاپ، لا ەميلياعا جاقىندادى. ەندى شەگىنەرگە جول جوق. الدا ارمانىمەن استاسقان بارسەلونا كۇتەدى.
ايزات ايدارقىزى
https://aikyn.kz/2018/11/03/72262.html?fbclid=IwAR1uAUe87tIiNfw7k_dIBnWQY0WmgkNGuwdJuhN0N9MS4Pu0Gs1SIz3YYEM
