بۇگىن ەكىباستۇز قالاسىنىڭ جىلۋسىز قالعان تۇرعىندارىنا «AMANAT» پارتياسىنان كەزەكتى گۋمانيتارلىق كومەك جىبەرىلدى. بۇل – 200 جىلىتقىش، 400 جىلى كورپە، 100 باتارەيا جانە باسقا دا قاجەتتى زاتتار.
ايتا كەتۋ كەرەك، ەكىباستۇزدا ءبىر اپتادان استام ۋاقىتتان بەرى ۆولونتەرلەر شتابى جۇمىس ىستەپ تۇر. شتابتا «جاستار رۋحىنىڭ» جانە وزگە دە ۇيىمداردىڭ وكىلدەرى جۇمىس ىستەيدى.
«وسىنداي قيىن كەزدە جاعدايعا بەيجاي قاراماي كومەككە كەلىپ جاتقان مەتسەناتتار، ۇەۇ، قازاقستاندىقتاردىڭ قاتارى كوپ. ەكىباستۇزداعى جىلۋسىز قالعان ۇيلەرگە 4,5 مىڭنان استام جىلىتقىش جەتكىزىلدى، ونىڭ 2,5 مىڭى ەلىمىزدىڭ ءار وڭىرىندەگى اماناتتىقتاردىڭ تاراپىنان بەرىلدى. ولاردىڭ ارقايسىسى مۇقتاج وتباسىلارعا جەتكىزىلەدى. بۇل جۇمىس قالاداعى جاعداي تولىق تۇراقتالعانعا دەيىن جالعاسادى»، – دەپ اتاپ ءوتتى «AMANAT» پارتياسى پاۆلودار وبلىستىق فيليالىنىڭ اتقارۋشى حاتشىسى يليا تەرەنچەنكو.
ول گۋمانيتارلىق كومەك ءبىر ورتالىقتان تاراتىلاتىنىن اتاپ ءوتتى. جىلىتقىش الۋعا وتىنىمدەر تەك ۆولونتەرلەر شتابىنىڭ +77054057128, +77779965010 بايلانىس نومىرلەرى نەمەسە ەكىباستۇز قالاسى، پاۆلودار كوشەسى، 10 ءۇي مەكەنجايى بويىنشا قابىلدانادى.
