كەلەسى اپتادا قاسىم-جومارت توقاەۆ رەسمي ساپارمەن رەسەيگە جانە فرانتسياعا بارادى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«پرەزيدەنت 28 قاراشا كۇنى رەسەي فەدەراتسياسىنا رەسمي ساپارمەن بارادى. مەملەكەت باسشىسى ماسكەۋدە رەسەي پرەزيدەنتى ۆلاديمير پۋتينمەن كەلىسسوز جۇرگىزەدى. سونداي-اق ەكى ەل باسشىلارى قازاقستان مەن رەسەيدىڭ وڭىرارالىق ىنتىماقتاستىق فورۋمىنىڭ جۇمىسىنا بەينەبايلانىس رەجيمىندە قاتىسادى.
29-30 قاراشا كۇندەرى قازاقستان پرەزيدەنتى فرانتسياعا رەسمي ساپارمەن بارادى. قاسىم-جومارت توقاەۆ پاريجدە فرانتسيا پرەزيدەنتى ەممانيۋەل ماكرونمەن كەلىسسوز جۇرگىزەدى دەپ جوسپارلانىپ وتىر. كەلىسسوز بارىسىندا ساۋدا-ەكونوميكالىق، ينۆەستيتسيالىق جانە گۋمانيتارلىق سالالارداعى ستراتەگيالىق سەرىكتەستىكتى دامىتۋ پەرسپەكتيۆالارى تالقىلانادى. سونىمەن قاتار مەملەكەت باسشىسى فرانتسيانىڭ ىسكەر توپتارى وكىلدەرىمەن بىرقاتار كەزدەسۋ وتكىزەدى»،—دەلىنگەن حابارلامادا.
