روبوت قۇراستىرۋشىلاردىڭ دۇنيەجۇزىلىك وليمپياداسى بار. World Robot Olympiad. 2004 جىلدان بەرى وتەدى. قازاقستاننىڭ وقۋشىلارى 2014 جىلدان بەرى قاتىسىپ كەلەدى.
بيىل العاش رەت وقۋشىلارىمىز جۇلدەلى ەكىنشى ورىندى يەلەندى. بۇل وليمپيادانى جەڭبەك تۇگىلى قاتىسۋ ءۇشىن جولداما الۋدىڭ ءوزى وڭاي ەمەس. دۇنيەجۇزىنەن 15 مىڭنان اسا كوماندا قاتىسىپ، 73 ەلدەن تەك قانا 365 كوماندا جولداما العان.
گەرمانيادا وتكەن سايىستىڭ فينالىنا شىمكەنتتىڭ جامبىل جاباەۆ اتىنداعى №26 مەكتەبى مەن №9 IT-ليتسەيادىڭ وقۋشىلارى يمانعالي مىڭجاسار مەن بيبارىس ميحاش شىعىپ، ەكىنشى ورىن الدى.
بۇل - ەلىمىزدىڭ ءبىلىم جۇيەسىندەگى ۇلكەن جەتىستىك. قازىر ءبىلىم سالاسىندا ءجۇرىپ جاتقان رەفورمالار، مۇعالىمدەر مارتەبەسى، ءبىلىم سالاسىنا كەلىپ جاتقان ينۆەستيتسيا جەتىستىكتەرگە جەتەلەيتىنى حاق.
ايتا كەتۋ كەرەك، سوڭعى جىلدارى شىمكەنت قالاسىنىڭ مەكتەپتەرىنە ارنايى كابينەتتەر كوپتەپ الىنىپ جاتىر. قازىرگى تاڭدا قالاداعى 127 مەكتەپتە روبوتوتەحنيكا كابينەتى بار. وقۋشىلار بوس ۋاقىتىندا روبوت قۇراستىرۋمەن اينالىسادى.
بوستوندا ەكى جىل تۇرعانىمدا روبوتتاردى يتشە جۇگىرتىپ قويعان Boston Dynamics-ءتىڭ جۇمىستارىن كورىپ، بولاشاقتىڭ كىلتى كىم روبوت قۇراستىرا الادى سونىڭ قولىندا ەكەن دەگەن وي كەلگەن. سونىمەن بىرگە CRISPR گەندى تۇزەۋ بيوتەحنولوگياسىنىڭ قالاي دامىپ جاتقانىن كورىپ وتىرساڭ، ءبىلىمدى جۇرتتىڭ عانا كەلەشەگى كەمەل بولاتىنى كامىل.
سونداي-اق وسىمەن مىنە ءۇشىنشى جىل شىمكەنت قالاسىنداعى مەكتەرتەردىڭ باستاۋىش سىنىپتارىنا شاحمات سىنىپتارى اشىلدى. اپتاسىنا ءبىر رەت 1-4 سىنىپ وقۋشىلارى مىندەتتى تۇردە شاحمات ساباعىنا قاتىسادى. بۇل ءوز كەزەگىندە باسقا دا پاندەردى يگەرۋگە سەپتىگىن تيگىزىپ جاتىر. الداعى ۋاقىتتا مىقتى شاحماتشىلار شىمكەنتتەن شىعىپ جاتسا تاڭعالماڭىز.
جالپى قازاقستانداعى ءاربىر بەسىنشى وقۋشى قازاقى وڭتۇستىك ءوڭىردىڭ مەكتەپتەرىندە وقيدى. دەمەك ەل ەكونوميكاسىن كوتەرۋ ءۇشىن الدىمەن وڭتۇستىكتىڭ ءبىلىم جۇيەسىن كوتەرۋ كەرەك دەپ ويلايمىن جانە سولاي بولىپ تا جاتىر.
شىڭعىس مۇقان
